Apple tanışlıq və romantik virtual yoldaş tətbiqlərinə 18+ həddi qoyacaq

    “Apple” 16 noyabr 2026-cı ildən “App Store”dakı tətbiqlərin yaş reytinqi qaydalarını yeniləyəcək. Tərtibatçılar “App Store Connect” platformasında 2 yeni suala cavab verəcəklər. Suallar tətbiqin istifadəçinin olduğu yeri paylaşması, eləcə də tanışlıq və münasibət funksiyalarının olub-olmaması ilə bağlıdır. Məqsəd tətbiqin məzmununu yaş reytinqində daha dəqiq göstərməkdir.    Tanışlıq və münasibət kateqoriyasına real insanlar arasında romantik əlaqə qurmağa kömək edən xidmətlər daxil olacaq. Romantik və ya seksual məzmun əsasında istifadəçi ilə ünsiyyət quran virtual yoldaşlar da eyni qaydaya tabe tutulacaq. Süni intellektlə işləyən virtual yoldaş tətbiqləri də bu kateqoriyaya daxildir. Belə funksiyaları olan tətbiqlər minimum 18+ yaş reytinqi alacaq.    Valideyn və ya qəyyum cihazda məzmun məhdudiyyəti qoyubsa, həmin tətbiqlər 18 yaşdan kiçik uşaqlara “App Store”da göstərilməyəcək. Yetkinlik yaşına çatmayan istifadəçi tətbiqi görsə belə, onu almaq və ya yükləmək üçün “Apple”-a yetkin olduğunu sübut etməli olacaq. Beləliklə, valideynlər yaş reytinqinə baxaraq tətbiqdə münasibət funksiyalarının olub-olmadığını görə biləcəklər.    İstifadəçinin olduğu yeri paylaşan tətbiqlərin minimum yaş həddi əksər regionlarda dəyişməyə bilər. Braziliyada yer paylaşan tətbiqlər A16, tanışlıq və münasibət funksiyalı tətbiqlər isə A18 reytinqi almalıdır. Valideynlə uşağın bir-birinin yerini görməsi üçün hazırlanan xidmətlərə daha aşağı rəsmi reytinq verilə bilər. Bunun üçün tərtibatçılar Braziliyanın Ədliyyə və İctimai Təhlükəsizlik Nazirliyinə müraciət etməlidirlər.    Yeni suallar “App Store Connect” platformasında 16 noyabrda görünəcək. Tərtibatçılar yeni tətbiq göndərəndə, hazırkı tətbiqi yeniləyəndə və ya yaş reytinqi sorğusunu dəyişəndə hər iki suala cavab verməlidirlər. Bütün tətbiqlər üzrə məlumatlar 12 yanvar 2027-ci ilədək tamamlanmalıdır.