İran Xarici İşlər Nazirliyi Kolumbiyanın Qüdsdə səfirlik açmaq qərarını kəskin pisləyib. Tehran bu addımın BMT Nizamnaməsinə və beynəlxalq hüququn fundamental prinsiplərinə zidd olduğunu bəyan edib.
Publika.az xəbər verir ki, İran XİN-in bəyanatında Qüdsün Fələstin ərazisinin ayrılmaz hissəsi olduğu vurğulanıb. Bildirilib ki, bütün dövlətlər beynəlxalq hüquqa uyğun olaraq İsrailin işğalını tanımaq kimi qiymətləndirilə biləcək addımlardan çəkinməlidir.
İran tərəfi Kolumbiyanın hazırkı rəhbərliyinin İsraillə yaxınlaşmasını, eləcə də Fələstin ərazilərinin işğalına legitimlik qazandırılmasını tənqid edib. Nazirliyin fikrincə, bu mövqe Kolumbiya və Latın Amerikası xalqlarının tarixində mühüm yer tutan müstəqillik və ədalət ideallarına ziddir.
Bəyanatda qeyd olunub ki, Kolumbiyanın Qüdsdə səfirlik açması xalqların öz müqəddəratını təyin etmək hüququna dair beynəlxalq öhdəlikləri ilə uzlaşmır və Fələstin xalqının bu hüququnun pozulmasına dəstək kimi qiymətləndirilə bilər.
İran Xarici İşlər Nazirliyi Kolumbiya hökumətinin beynəlxalq hüquqa zidd hesab etdiyi bu qərarın nəticələrinə görə məsuliyyət daşımalı olduğunu bildirib.
Müəllif: Adəm
