Ölkə.az xəbər verir ki, Valtonen 12 oktyabrda digər üzv dövlətləri X sosial şəbəkəsində Avropa Komissiyasına etdiyi müraciətə qoşulmağa dəvət etdiyini bildirib.
Nazir deyib: "Rusların Avropaya gəlib buradakı həyat tərzindən və azadlıqlardan zövq alması, Rusiyanın ukraynalıların evlərini bombaladığı bir vaxtda səhvdir".
Valtonen qeyd edib ki, Finlandiya artıq 2022-ci ildə rusların vacib olmayan səyahətləri üçün vizaları qadağan edib və eyni tədbirin Aİ səviyyəsində tətbiq edilməli olduğunu bildirib.
O, həmçinin Rusiya prezidenti Vladimir Putinə yaxın insanlar üçün Şengen vizalarının qadağan edilməsini və rusiyalı idmançılar üçün vizaların məhdudlaşdırılmasını təklif edib. O, həmçinin Ukraynadakı müharibədə iştirak edən ruslara viza qadağasının effektiv şəkildə tətbiq edilməsinə çağırıb.
Rusiya vətəndaşları üçün viza siyasətinin sərtləşdirilməsi ilə bağlı əvvəllər də təkliflər olub. Sentyabr ayında Aİ-nin Xarici işlər və təhlükəsizlik siyasəti üzrə ali nümayəndəsi Kaya Kallas Moskvanın "hibrid hücumlarına" cavab olaraq məhdudiyyətlərin sərtləşdirilməsini, o cümlədən turist vizalarının sayının azaldılmalı olduğunu bildirib.
Bu arada Estoniya Ukraynadakı müharibədə iştirak edən keçmiş rus hərbçiləri üçün vizaların qadağan edilməsini təklif edib. Bu tədbir daha sonra digər Baltikyanı və Şimali Avropa ölkələri tərəfindən dəstəklənib.
İyun ayında bir qrup Aİ ölkəsi rusiyalılara turist vizalarının verilməsini dayandırmaq üçün birgə çağırış edib. Onların imzaladığı məktubda deyilir ki, 2025-ci ildə Rusiya vətəndaşlarına Şengen zonasındakı 29 ölkəyə səyahət üçün 470.000 viza verilib.
Avstriya parlamentinin saytında dərc olunmuş sənədə görə, Aİ Şurasının 14 oktyabrda Rusiyaya qarşı viza siyasətini müzakirə etməsi planlaşdırılır.
