Fransanın paytaxtı Parisdə kütləvi etiraz aksiyaları axşama doğru daha da şiddətlənərək iğtişaşlara çevrilib.
News24.az RİA Novosti”yə istinadən xəbər verir ki, şəhərin mərkəzində vəziyyət tamamilə nəzarətdən çıxıb.
Agentlik yazır ki, etirazçılar Madjenta bulvarında mağazaların vitrinlərini və bankomatları darmadağın etməyə başlayıblar.
Məlumata görə, aksiyaçılar ictimai nəqliyyat dayanacaqlarını, zibil qutularını və küçədə saxlanılan avtomobilləri yandırmağa başlayıblar. Toqquşmalar hələ yürüş başlamazdan əvvəl, Respublika meydanında start götürüb. Nümayişçilər hüquq-mühafizə orqanlarının əməkdaşlarına şüşə butulkalar, daşlar və yandırıcı maddələr atıblar. Buna cavab olaraq təhlükəsizlik qüvvələri gözyaşardıcı qaz və səs qumbaralarından tətbiq edib.
Xatırladaq ki, Fransada kütləvi etirazlar yanacağın kəskin bahalaşması və əhalinin alıcılıq qabiliyyətinin düşməsinə qarşı keçirilir. Analoji sərt toqquşmalar Lion və digər böyük şəhərlərdə də qeydə alınıb.
