İngiltərə əsrlər əvvəl transatlantik kölə ticarətində oynadığı rola görə rəsmi üzr istəmək məsələsini gündəmə gətirib.
News24.az xəbər verir ki, Afrika və Karib hövzəsi ölkələrinin artan tələblərindən sonra İngiltərə hökuməti kölə ticarətindəki tarixi məsuliyyətini qəbul etməyə və rəsmi üzr istəməyə hazır olduğunu açıqlayıb.
Baş nazir Endi Börnham isə kompensasiya ödənilməsinə qarşı çıxıb. Onun sözlərinə görə, bunun əvəzinə inkişaf etməkdə olan ölkələrin borclarının yenidən strukturlaşdırılması nəzərdən keçirilə bilər.
Məlumata görə, XVI–XIX əsrlər ərzində təxminən 12 milyon afrikalı zorla gəmilərlə Amerika qitəsinə aparılıb. Onlar əsasən Karib hövzəsi və Amerikadakı şəkər, tütün və digər kənd təsərrüfatı plantasiyalarında işlədiliblər. Bu ticarətdə ingilis gəmiləri kölə vəziyyətinə salınaraq Atlantik okeanı vasitəsilə daşınan afrikalıların təxminən dörddəbirini aparıb.
Karib Hövzəsi Birliyinə (CARICOM) üzv 15 ölkə 2013-cü ildə kölə ticarətinin nəticələrinə görə keçmiş müstəmləkəçi dövlətlərdən təzminat tələb edib. 2023-cü ildə Afrika İttifaqı da bu tələbləri dəstəkləyib.
Qeyd olunur ki, Qərbi Hind Universiteti üçün hazırlanmış hesabatda İngiltərənin 14 Karib ölkəsinə təxminən 24 trilyon dollar təzminat borclu ola biləcəyi ehtimal edilib.
Kral III Çarlz da Karib hövzəsinə səfəri zamanı köləlik dövrünü bəşər tarixinin utancverici səhifələrindən biri adlandırıb. O, həmin hadisələrin onda dəhşət hissi yaratdığını bildirib. Bununla belə, kral İngiltərə adından rəsmi üzr istəməyib.
Bukingem sarayından bildirilib ki, rəsmi üzr məsələsi kralın deyil, seçilmiş hökumətin səlahiyyətindədir.
