Fransanın paytaxtı Parisdə təhsil sistemindəki problemlərə etiraz olaraq tələbələrin və həmkarlar ittifaqlarının təşkil etdiyi nümayişlərə minlərlə insan qatılıb.
News24.az TASS-a istinadən xəbər verir ki, nümayişçilərin iki yürüş kolonu İtaliya meydanından və şəhər meriyasının qarşısındakı meydandan hərəkətə başlayıb.
Etirazçılar arasında prezidentliyə namizəd, "Azad Fransa" partiyasının qurucusu Jan-Lük Melanşon da olub.
Daha sonra polis əməkdaşları ilə etirazçıların aqressiv qrupları arasında toqquşmalar baş verib. Hüquq-mühafizə orqanları izdihamı dağıtmaq üçün gözyaşardıcı qazdan istifadə ediblər.
İlk qarşıdurmalar tələbə təşkilatlarının və həmkarlar ittifaqlarının yürüş kolonlarının görüşməli olduğu Port-Royal metrostansiyasının yaxınlığında başlayıb. Lakin həmkarlar ittifaqlarının yürüşü həmin ərazidən xeyli əvvəl keçərək Voban meydanındakı son dayanacağa çatıb. Orta məktəb şagirdləri və tələbələrin yürüş kolonu isə polislə qara kapüşonlu geyimlər və maskalar taxmış aqressiv nümayişçi qrupları arasında baş verən qarşıdurmalar səbəbindən gecikib.
BFMTV telekanalının məlumatına görə, Port-Royal metrostansiyasına yaxınlaşarkən aqressiv qruplardan biri avtomobili yandırmağa cəhd edib. Bu hərəkətlə razılaşmayan digər nümayişçilər həmin şəxsləri yürüş kolonunu tərk etməyə məcbur ediblər. Nümayiş ərazisində təhlükəsizliyi təmin edən polislər isə bu münaqişəyə müdaxilə etməyiblər.
Orta məktəb şagirdlərinin etiraz aksiyaları sentyabrın sonunda Parisin yerləşdiyi İl-de-Frans regionunda başlayıb və hazırda bütün Fransanı əhatə edir. İştirakçılar həddindən artıq yüklənmiş dərs cədvəlinə, müəllim çatışmazlığına və təhsil sistemindəki digər problemlərə etiraz edirlər.
Bəzi ərazilərdə aksiyalar iğtişaşlara və polislə toqquşmalara çevrilib. Etirazlar başlayandan bəri jandarmlar və polis əməkdaşları təxminən 7 000 nəfəri saxlayıblar. Saxlanılanların böyük əksəriyyəti yetkinlik yaşına çatmayanlar olub.
