Azərbaycan Karate Federasiyasının təşkilatçılığı və Avropa çempionu Mədinə Sadıqovanın iştirakı ilə qadın idmançılar üçün seminar keçirilib.
Modern.az xəbər verir ki, bu barədə Azərbaycan Karate Federasiyasının prezidenti, Milli Məclisin deputatı Ülvi Quliyev paylaşım edib.
O bildirib ki, tədbirdə müxtəlif yaş qruplarından 200-dən çox qadın karateçi iştirak edib. Seminarın əsas məqsədi qadın karatesinin inkişafına dəstək vermək, idmançılar arasında birlik, həmrəylik və komanda ruhunu gücləndirmək olub.
“Gənc nəslin peşəkar idmançılarla ünsiyyətdə olması və təcrübə qazanması onların gələcək nailiyyətləri üçün böyük stimuldur. Federasiya olaraq istedadlı idmançıların üzə çıxarılması və karatenin ölkə üzrə kütləviləşməsi istiqamətində layihələrimizi qətiyyətlə davam etdirəcəyik”, – deyə Ülvi Quliyev qeyd edib.
Federasiya prezidenti seminarda fəal iştirak edən qadın karateçilərə təşəkkür edib, onlara gələcək yarışlarda uğurlar arzulayıb.
.png)
