Limon seçərkən qabığında yumşalmış və sulu ləkələrə bənzəyən hissələrin olub-olmadığını yoxlamaq lazımdır. Belə sahələr kiflənmənin ilkin əlaməti ola bilər.
Lent.az xarici mediaya istinadla xəbər verir ki, Kaliforniya Universitetinin Lindkov Tədqiqat və Məsləhət Mərkəzinin sitrus bitkiləri üzrə mütəxəssisi Sandipa Qautam limon seçərkən nələrə diqqət yetirilməli olduğunu açıqlayıb.
Mütəxəssis qabığı zədələnmiş limonları almamağı tövsiyə edir. Onun sözlərinə görə, qabıqdakı kiçik bir zədə belə kif göbələyinin meyvəyə daxil olmasına şərait yarada bilər.
Mağazada problemin yeganə görünən əlaməti qabığın müəyyən hissəsinin süngər kimi yumşalması ola bilər. Sonradan isə həmin sahədə çürümə və kif sürətlə inkişaf edə bilər. Buna görə də limonun yalnız rənginə baxmaq kifayət etmir.
Qoxusuna da diqqət edin
Qautam bildirir ki, xarab olmağa başlayan limonun özünəməxsus, qeyri-adi qoxusu olur. Lakin mağazada müxtəlif qoxular bir-birinə qarışdığından bunu hiss etmək çətinləşə bilər.
Limonun qoxusu xoşagəlməzdirsə, onu almamaq məsləhətdir. Bu üsul çiyələk də daxil olmaqla digər meyvələri seçərkən də faydalı ola bilər.
Mütəxəssisin sözlərinə görə, kiflənmənin qarşısını almaq üçün limonlara yığımdan sonra göbələk əleyhinə vasitələr tətbiq olunur. Bununla belə, alış zamanı meyvənin qabığını və ümumi vəziyyətini yoxlamaq vacibdir.
Daha yaxşı limonu necə seçməli?
Qabığında zədə, sulu ləkə, görünən kif və dərin əziklər olmayan limonlara üstünlük vermək lazımdır. Qautam əlavə olaraq qabığın möhkəm olmasına və meyvənin ölçüsünə görə ağır gəlməsinə diqqət yetirməyi tövsiyə edir.
