IX əsrdə yaşamış qorxmaz vikinq döyüşçüsü, Orkney yarlı Güclü Sigurd tarixdə qeyri-adi və dəhşətli ölümü ilə yadda qalıb. Onun həyatına döyüş meydanında aldığı ağır yara deyil, məğlub etdiyi düşmənin kəsilmiş başından aldığı kiçik bir cızıq son qoyub.
Rəvayətə görə, Sigurd Moray bölgəsinin hökmdarı olduğu ehtimal edilən şotland yarl Mael Brigte ilə sülh danışıqları aparmaq barədə razılığa gəlir. Tərəflər görüşə 40 nəfərdən artıq olmayan silahlı dəstə ilə gəlməli idilər. Lakin Sigurd şotlandlara etibar etməyərək razılaşmanı pozur: 40 atın hər birinə iki döyüşçü mindirərək görüş yerinə 80 nəfərlə gəlir.
Razılaşmaya əməl edən Mael Brigte isə qarşı tərəfin bu hiyləsindən xəbərsiz idi. Sayca üstün olan vikinqlərlə döyüşdə şotlandlar qəhrəmancasına müqavimət göstərsələr də, məğlubiyyətə uğrayırlar. Mael Brigte də daxil olmaqla, onun bütün döyüşçüləri öldürülür.
Həmin dövrdə keltlər arasında məğlub edilmiş düşmənlərin başını kəsərək qənimət kimi götürmək adəti hələ də mövcud idi. Qələbədən sonra Sigurd da Mael Brigtenin kəsilmiş başını götürərək öz yəhərinə bağlayır. Şotland yarlın iri və qabağa çıxmış dişlərinə görə ona “Dişli Mael Brigte” deyirdilər.
Lakin Sigurdun qələbə sevinci uzun çəkmir. At belində döyüş meydanından uzaqlaşarkən yəhərə bağlanmış baş yırğalanmağa başlayır. Mael Brigtenin iti dişləri Sigurdun ayağına sürtünərək dərisini cızır.
İlk baxışdan əhəmiyyətsiz görünən bu yara sonradan infeksiyalaşır. Güclü vikinq döyüşçüsü, saysız-hesabsız döyüşlərdən sağ çıxmış yarl Sigurd məhz həmin yaranın yaratdığı infeksiya nəticəsində həyatını itirir.
Beləliklə, onu döyüş meydanında məğlub etdiyi düşmənin cansız başı öldürmüş olur.
Sigurdun ölümü vikinqlər dövrünün qəddar müharibə reallıqlarını əks etdirən ən qəribə tarixi hadisələrdən biri kimi xatırlanır. Bu hekayə həm də həyatın ironiyasını göstərir: saysız-hesabsız döyüşlərdən qalib çıxan qüdrətli bir sərkərdənin taleyini kiçik bir yara həll edə bilər.
Hazırladı: Ağagül Mürsəlov,
KONKRET.az
