Polşanın “Rakuv” futbol komandasında çıxış edən Azərbaycan millisinin hücumçusu Mahir Emreli növbəti dəfə məhsuldar oyunu ilə diqqət çəkib.
İdman.Biz xəbər verir ki, 29 yaşlı futbolçu Polşa Ekstraklasasının 13-cü turunda “Poqon Şetsin”lə keçirilən qarşılaşmada məhsuldar ötürmə ilə yadda qalıb.
Görüş G“Rakuv”un 3:1 hesablı qələbəsi ilə yekunlaşıb.
Start heyətində meydana çıxan Emreli komandasının 47-ci dəqiqədə vurduğu ilk qolun ötürməsini verib. Onun ötürməsindən sonra Patrik Makuç fərqlənərək hesabı bərabərləşdirib - 1:1.
Azərbaycanlı hücumçu 71-ci dəqiqədə Olivier Kviatkovski ilə əvəzlənib.
Meydan sahiblərinin digər qollarını 73-cü dəqiqədə Boqdan Rakovitan və 90+7-ci dəqiqədə Tomaş Pyenko vurublar. Qonaqların yeganə qoluna isə beşinci dəqiqədə Darko Çurlinov imza atıb.
Qeyd edək ki, “Rakuv” növbəti oyununu noyabrın 8-də səfərdə “Legiya Varşava”ya qarşı keçirəcək.
