Azərbaycanın sərbəst güləş üzrə milli komandasının baş məşqçisi Xetaq Qazyumov Qazaxıstanın paytaxtı Astanada keçirilən dünya çempionatında yığmanın çıxışından narazı qaldığını bildirib.
İdman.Biz xəbər verir ki, mütəxəssis jurnalistlərə açıqlamasında komandanın gözləntiləri doğrultmadığını etiraf edib və uğursuz nəticəyə görə məsuliyyəti öz üzərinə götürüb.
“Bu nəticəyə görə kimsə cavabdeh olmalıdır və həmin məsuliyyəti mən daşıyıram. Azərbaycan azarkeşlərindən, bütün idmansevərlərdən üzr istəyirəm”, - deyə Qazyumov bildirib.
Baş məşqçinin sözlərinə görə, yığmanın dünya çempionatındakı çıxışı federasiya rəhbərliyi ilə də müzakirə edilib. Görüş zamanı komandanın nəticələrindən narazılıq ifadə olunub və məşqçilər heyətinə iradlar çatdırılıb.
“Federasiya rəhbərliyi ilə söhbətimiz oldu. Komandanın nəticələri qənaətbəxş hesab edilmədi və müəyyən iradlar səsləndirildi. Məşqçilər heyəti olaraq bunları qəbul edirik. İdmançılarımız bacardıqları səviyyədə mübarizə aparmadılar. Qarşıdakı dövrdə çatışmazlıqları aradan qaldırmaq üçün çalışacağıq”, - deyə mütəxəssis vurğulayıb.
Qazyumov bildirib ki, federasiya tərəfindən hazırlıq üçün lazımi şərait yaradılsa da, ilboyu davam edən məşqlərin nəticəsi dünya çempionatında özünü doğrultmayıb.
“Turnirə ciddi hazırlaşırdıq və daha yaxşı nəticələr əldə edəcəyimizə inanırdıq. Əsas hədəflərimizdən biri qızıl medal qazanmaq idi. Təəssüf ki, bəzi güləşçilərimiz öz potensiallarını göstərə bilmədilər. Xüsusilə həlledici qarşılaşmalardakı çıxışları bizi məyus etdi. Onlardan daha yüksək nəticələr gözləyirdik. Komandanın hazırlıq səviyyəsini ümumilikdə pis qiymətləndirməzdim, amma idmançılarımız imkanlarından tam istifadə edə bilmədilər”, - deyə baş məşqçi əlavə edib.
Mütəxəssis uğursuz çıxışdan nəticə çıxarılacağını, məşq prosesindəki nöqsanların təhlil ediləcəyini və növbəti yarışlarda daha yüksək göstəricilərə nail olmaq üçün işlərin gücləndiriləcəyini qeyd edib.
Xatırladaq ki, Azərbaycan millisi yarışı altı medalla tamamlayıb. Yığmanın aktivinə iki qızıl, iki gümüş və iki bürünc mükafat yazılıb. Yığmanın medal qazanan altı üzvündən üçü yunan-Roma, üçü isə sərbəst güləş üzrə mübarizə aparıb.
