“Barselona”nın baş məşqçisi Hans-Diter Flik Avropanın digər klublarının marağına baxmayaraq, futbolçusu Dani Olmonun komandadan ayrılmasına qarşı çıxır.
İdman.Biz İspaniyanın “El Nacional” nəşrinə istinadən xəbər verir ki, almaniyalı mütəxəssis 28 yaşlı futbolçunu komandasının əsas üzvlərindən biri hesab edir və onun satışına razılıq vermək niyyətində deyil.
Xüsusilə Münhen “Bavariya”sının Olmo ilə maraqlandığı barədə vaxtaşırı məlumatlar yayılır. Lakin mənbənin bildirdiyinə görə, hətta böyük məbləğdə transfer təklifi daxil olsa belə, Flikin mövqeyi dəyişməyəcək.
Baş məşqçinin ispaniyalı yarımmüdafiəçiyə inamı La Liqada “Xetafe” ilə keçirilən son oyundan (3:0) sonra daha da artıb. Start heyətində Fermin Lopesin meydana çıxacağı gözlənilsə də, Flik Olmoya üstünlük verib. Futbolçu isə çıxışı ilə məşqçisinin etimadını doğruldub.
Bildirilir ki, almaniyalı mütəxəssis Olmonu taktiki planlarının mühüm hissəsi hesab edir və onu itirmək istəmir.
Qeyd edək ki, “Transfermarkt” portalı Dani Olmonun bazar dəyərini 60 milyon avro (120 milyon manat) qiymətləndirir.
