Azərbaycan Kubokunun ikinci təsnifat mərhələsində keçirilən “Səbail” - “Zirə” qarşılaşmasında hakim qərarı ilə bağlı qeyri-adi hadisə yaşanıb. Meydan sahiblərinin futbolçusu Samuel Nonqoh iki sarı vərəqə almasına baxmayaraq, oyunu sona qədər davam etdirib.
İdman.Biz Sportal.az-a istinadən xəbər verir ki, kamerunlu futbolçu 68-ci və 80-ci dəqiqələrdə sarı vərəqə ilə cəzalandırılıb. Lakin matçın baş hakimi Səbuhi Bayramov ikinci xəbərdarlıqdan sonra ona qırmızı vərəqə göstərməyib.
Beləliklə, qaydalara əsasən meydandan kənarlaşdırılmalı olan Nonqoh qarşılaşmanın qalan hissəsində də komandasının heyətində oynayıb.
Qeyd edək ki, görüşün əsas vaxtı 1:1, əlavə vaxtı isə 2:2 hesabı ilə başa çatıb. Penaltilər seriyasında 3:2 hesabı ilə qalib gələn “Zirə” növbəti mərhələyə yüksəlib.
