Şamaxı şəhər stadionu növbəti dəfə ziddiyyətli mənzərəyə ev sahibliyi edəcək. Oktyabrın 31-də, Misli Premyer Liqasının X turunda mövsümün gedişində hələ də qələbə qazana bilməyən “Araz-Naxçıvan” avrokubok zonasına düşməyə çalışan “Zirə” ilə üz-üzə gələcək.
Ziddiyyətli seriya
Rəşad Sadıqovun rəhbərlik etdiyi “Zirə” cari mövsümdə qeyri-sabit gedişi ilə diqqət çəkir. Keçirdiyi 9 oyunda 4 qələbə, 3 heç-heçə və 2 məğlubiyyət əldə edən qəsəbə təmsilçisi aktivinə yazdırdığı 15 xalla 5-ci pillədə qərarlaşıb. Komandanın vurduğu və buraxdığı qolların bərabər olması (12:12) “qartallar”ın oyunundakı balanssızlığı və epizodik səhvləri açıq göstərir.
Çempionatın son 5 matçında qeydə alınan nəticələr, yəni “Qarabağ”la heç-heçə, “Turan Tovuz”a minimal hesablı məğlubiyyət, “Şamaxı” və “Kəpəz”lə “sülh”, eləcə də “Sumqayıt” üzərində 3:2 hesablı qələbə ziddiyyətli mənzərə yaradır. Bu, “qartallar”ın istənilən rəqibə başağrısı ola bildiyini, lakin eyni zamanda aşağı pillələrdəki komandalarla matçlarda da xal itkiləri ilə üzləşdiyini göstərir. Üstəlik, kubokda I Liqa təmsilçisi “Səbail”lə matçda əsas vaxtın 2:2 başa çatması və penaltilərdə çətinliklə qalib gəlmələri komandanın psixoloji gərginlikdən tam azad olmadığını sübut edir. Buna baxmayaraq, “Zirə” Şamaxı səfərinə açıq favorit kimi gəlir.
“Araz-Naxçıvan”ın çıxış yolu
Naxçıvan klubunda isə vəziyyət gündən-günə ağırlaşır. Cari mövsümdə hələ də qələbə üzünə həsrət qalan Yuri Maksimovun yetirmələri 9 matçda cəmi 2 heç-heçə edib, 7 dəfə isə məğlub olublar. Aktivində cəmi 2 xal olan komanda turnir cədvəlinin sonuncu, 12-ci pilləsində “zirzəmiyə kilidlənib”. Top fərqindəki acınacaqlı mənzərə (7:19) fonunda “Araz-Naxçıvan” üçün hər qarşılaşma qurtuluş nöqtəsinə çevrilib.
Ancaq ev sahibləri üçün qarşıdakı matç öncəsi ən sevindirici xəbər Ağadadaş Salyanskinin qayıdışıdır. “Sumqayıt”la görüşdə (1:2) iki sarı vərəqə ilə meydandan qovulan və 1 oyunluq cəzasını ötən tur “Qəbələ” ilə matçda (1:2) çəkən gənc hücumçu sıradadır. Salyanskinin hücum xəttinə qayıtması Naxçıvan təmsilçisinin qol potensialını artıracaq əsas amildir.
Statistika nə deyir?
İki komanda arasındakı son oyunların statistikası rəqabətin gərgin keçdiyini göstərir. Son 5 görüşün statistikası göstərir ki, tərəflərdən heç biri rəqibinə asan xal verməyib:
23 may 2026. “Araz-Naxçıvan” – “Zirə” 3 – 2
27 fevral 2026. “Araz-Naxçıvan” – “Zirə” 0 – 1
19 avqust 2025. “Zirə” – “Araz-Naxçıvan” 1 – 1
25 may 2025. “Araz-Naxçıvan” – “Zirə” 0 – 1
18 yanvar 2025. “Zirə” – “Araz-Naxçıvan” 1 – 0
Şamaxı şəhər stadionunda keçiriləcək bu duel “Zirə” üçün avrokubok yarışından geri qalmamaq, “Araz-Naxçıvan” üçün isə uzun həsrətə son qoyaraq qurtuluş yolunu tapmaq deməkdir. Salyanskinin qayıdışı Naxçıvan klubuna ümid versə də, Rəşad Sadıqovun kollektivi üçün 3 xaldan başqa hər hansı nəticə uğursuzluq sayılacaq.
Ayxan Zayıdzadə
