Azərbaycan Güləş Federasiyasının təşkilatçılığı ilə ilk dəfə güləş üzrə Gəncə Kuboku təşkil olunub.
Futbolpress.az xəbər verir ki, Gəncə Olimpiya İdman Kompleksinin ev sahibliyi etdiyi turnirdə U-15 yaş kateqoriyasında 8 komanda mübarizə aparıb.
Gərgin keçən qarşılaşmaların yekununda bütün rəqiblərini üstələyən Sumqayıt təmsilçiləri kubokun qalibi olublar. Fəxri kürsünün ikinci pilləsində “Gəncə-1” komandası qərarlaşıbsa, Lənkəran idmançıları üçüncü yeri tutaraq mükafatçılar sırasına daxil olublar.
Yarışın əsas qayəsi bölgələrdə idmanın bu növünün kütləviliyini artırmaq, yeniyetmə idmançıların təcrübəsini zənginləşdirmək və perspektivli istedadları aşkar edərək cəmləşdirməkdir.
