UEFA Çempionlar Liqasının əsas mərhələsində keçiriləcək “Sabah” — “Borussiya” (Dortmund, Almaniya) qarşılaşmasının biletləri satışa çıxarılıb.
Futbolpress.az xəbər verir ki, bu barədə Bakı təmsilçisinin mətbuat xidməti məlumat yayıb.
Oyun üçün nəzərdə tutulan biletlərin qiyməti 15-650 manat aralığında müəyyənləşdirilib. Azarkeşlər biletləri “iTicket.az” platforması vasitəsilə əldə edə bilərlər. Oktyabrın 20-də Bakı Olimpiya Stadionunda təşkil olunacaq qarşılaşmanın start düdüyü saat 20:45-də səslənəcək.
Turnir cədvəlindəki vəziyyətə gəlincə, ilk turdan sonra Dortmund klubunun aktivində 3 xal var, “Sabah” isə hələ xal qazana bilməyib. Almaniya təmsilçisi ilk oyunda “Vilyarreal”a 3:2 hesabı ilə qalib gəldiyi halda, Masazır klubu “Mançester Yunayted”ə 0:4 hesabı ilə məğlub olub.
Bu qarşılaşmayadək hər iki komanda Çempionlar Liqasında növbəti matçlarına çıxacaqlar. “Bayquşlar” oktyabrın 13-də Bakıda Praqa “Slaviya”sını qəbul edəcək, “Borussiya” isə bir gün sonra səfərdə Norveçin “Bodo-Qlimt” klubu ilə üz-üzə gələcək.
