İranın ali rəhbəri Müctəba Xameneinin yeni xəbərdarlığı ABŞ–İran qarşıdurmasını daha təhlükəli mərhələyə keçirib. Tehran müharibənin yalnız Yaxın Şərqlə məhdudlaşmayacağını, Avropadakı hərbi obyektlərin də hədəfə çevrilə biləcəyini bəyan edir.
Müctəba Xamenei hərbi komandanlığa ABŞ və İsrailin yeni hücumuna coğrafi məhdudiyyət olmadan cavab vermək göstərişi verib. Bu, döyüşlərə birbaşa qatılmayan, lakin Amerika qüvvələrinə hərbi imkanlar yaradan ölkələr üçün də xəbərdarlıq kimi qiymətləndirilir.
“Al Jazeera”nin məlumatına görə, İranın keçmiş xarici işlər naziri Mənuçöhr Müttəki Böyük Britaniya, Almaniya, İtaliya və Portuqaliyanı mümkün müharibənin coğrafiyasına daxil edib. İranın “Kayhan” qəzeti isə Avropadakı ABŞ və NATO bazalarını potensial hədəflər kimi göstərib.
Britaniyanın “The Jewish Chronicle” nəşrinin noyabrın 3-də yaydığı məlumata əsasən, İranın “Hamşəhri” qəzeti Avropa xəritəsində Britaniya, Fransa, Almaniya və digər ölkələrdəki obyektlərin qırmızı nişanlarla göstərildiyi təhdid xarakterli vizual yayımlayıb.
Anadolu Agentliyinin İsrailin KAN telekanalına istinadən verdiyi xəbərə görə, ABŞ regiona hərbi yük təyyarələri göndərərək qüvvələrini gücləndirir. Daha altı yük təyyarəsinin yola salındığı barədə məlumatlar da yayılıb, lakin bu son rəqəm müstəqil təsdiqini tapmayıb.
“The Wall Street Journal”ın məlumatına görə, ABŞ Mərkəzi Komandanlığının rəhbərliyi Donald Trampa İrana qarşı yeni hərbi əməliyyat variantlarını təqdim edib.
Beləliklə, Tehran Avropadakı hərbi obyektləri hədəf göstərir, Vaşinqton isə bölgəyə əlavə qüvvələr göndərir.
Ən təhlükəli məqam budur: ABŞ-nin İrana yeni zərbəsi yalnız iki ölkənin deyil, Avropanın və Körfəz dövlətlərinin də daxil olduğu genişmiqyaslı müharibəyə yol aça bilər.
Musavat.com
