Yəməndə davam edən qarşıdurmalar səbəbindən avqustun 1-dən etibarən 184 mindən çox insan yaşadığı ərazini tərk etmək məcburiyyətində qalıb.
BAKU.WS xəbər verir ki, bu barədə BMT-nin Humanitar Məsələlərin Əlaqələndirilməsi Ofisi (OCHA) məlumat yayıb.
Bildirilib ki, yalnız son bir həftə ərzində 21 mindən çox insan didərgin düşüb. BMT və humanitar yardım təşkilatları indiyədək 126 mindən çox insana təcili yardım göstərib. Lakin ehtiyacların mövcud resursları üstələməkdə davam etdiyi qeyd olunub.
Ümumdünya Səhiyyə Təşkilatı isə maliyyə çatışmazlığının səhiyyə sisteminə təzyiqi artırdığını açıqlayıb. Məcburi köçkünlərin məskunlaşdığı düşərgələr də daxil olmaqla, son həftələrdə vəba hallarının üç dəfə artdığı bildirilib. Qızılca, denq qızdırması və malyariyanın da yayılmaqda davam etdiyi qeyd olunub.
OCHA həmçinin Taiz vilayətini Hudeydə, Ədən və Səna kimi şəhərlərlə birləşdirən əsas yolların bağlı olduğunu bildirib. Bunun nəticəsində mülki şəxslərin hərəkəti, ərzaq və digər malların daşınması, eləcə də humanitar yardımın çatdırılması məhdudlaşıb.
Təşkilat ölkədə əsas tələbat malları və tibbi ləvazimatların çatışmazlığı, həmçinin ərzaq və yanacaq qiymətlərinin sürətlə artması ilə bağlı narahatlığını ifadə edib.
