Avropa İttifaqı Şurası Rusiyaya Avropa məhdudiyyətlərinə məruz qalan məhsulların tədarükündə və neft, maliyyə sektorlarında sanksiyalardan yayınma sxemlərində iştirak edən 3 fiziki şəxsə və 9 şirkətə qarşı sanksiyalar tətbiq edib.
"Bakupost" xəbər verir ki, bu barədə Aİ-nin xarici siyasət və təhlükəsizlik məsələləri üzrə ali nümayəndəsi Kaya Kallas məlumat verib.
Sanksiya siyahısına Rusiyanın “Movers Group”, “DT Inier” və “United Stream” logistika və maliyyə şirkətləri, eləcə də onların rəhbərləri və sahibləri daxil edilib. Türkiyədə qeydiyyatdan keçmiş “Begler” və “MEDSE Group” ticarət şirkətləri də məhdudiyyətlərə məruz qalıb. Aİ-nin məlumatına görə, bu şirkətlər sanksiyalardan yayınma sxemlərində iştirak edirlər.
Bundan əlavə, Birləşmiş Ərəb Əmirlikləri, Hindistan və Seyşel adalarında fəaliyyət göstərən, Rusiyanın “kölgə donanması” və neft tədarükü ilə əlaqəli şirkətlərə qarşı da tədbirlər görülüb. Onların arasında “DIS Logistics”, “Vigor Marine Services”, “Shiva Shipping” və Rusiya neftini Hindistana tədarük edən vasitəçi “Hurus Trade” şirkəti var.
Sanksiyaya məruz qalan şəxslərin aktivləri dondurulacaq, onlara maliyyə və iqtisadi resursların təqdim edilməsi qadağan olunacaq. Fiziki şəxslərin isə Avropa İttifaqına girişinə məhdudiyyət qoyulacaq.
Kaya Kallas bildirib ki, Brüssel Rusiyanın Ukraynaya qarşı müharibəni davam etdirməsini daha çətin və baha başa gələn etmək üçün səylərini davam etdirəcək.
