İsrail Müdafiə Qüvvələrinin (İMQ) Baş Qərargah rəisi general-leytenant Eyal Zamir ölkənin siyasi rəhbərliyinin çərşənbə axşamı keçiriləcək Knesset seçkilərindən əvvəl İrana qarşı hərbi əməliyyat əmri vermək cəhdinə qarşı çıxıb.
İsrailin Kanal12 televiziyasının məlumatına görə, Zamir rəsmilərin mahiyyətini açıqlamadığı əməliyyata qarşı çıxıb və Baş nazir Benyamin Netanyahudan hazırlanmış əmrin icrasına başlamazdan əvvəl bu addım üçün "hüquqi əsaslandırması olan yazılı sənəd" təqdim etməsini tələb edib.
"Son dərəcə həssas və dramatik bir anda İranla sürətli bir münaqişəyə səbəb ola biləcək bir addımdan danışırıq, belə bir səhv hesablama son dərəcə risklidir" - Kanalın istinad etdiyi hərbi mənbə bildirib.
Kanal həmçinin digər məlumatlı mənbələrə istinadən hərbi rəhbərliyin siyasətçilərin "İran məsələsindən öz siyasi maraqları üçün istifadə etməyə" çalışmalarından narahat olduğunu bildirir.
Ötən cümə günü İsrail Müdafiə Qüvvələrinin Baş Qərargah rəisi bildirib ki, hazırda Knesset seçkilərindən əvvəl İrana qarşı zərbələri bərpa etmək üçün heç bir əməliyyata ehtiyacı yoxdur. Bununla belə, o qeyd edib ki, "əgər belə bir zərbənin zəruri olduğu qənaətinə gəlsək, onu həyata keçirəcəyik".
İsrailli tənqidçilər Netanyahunu 27 oktyabr səsverməsinin nəticəsinə təsir göstərmək və ya onun təxirə salınmasına məcbur etmək üçün İranla müharibəni yenidən alovlandırmağa çalışmaqda ittiham edirlər. Netanyahu isə bu ittihamları rədd edir.
Tahir TAĞIYEV
