Bakının "Sea Breeze" kurort kompleksində inşası davam edən ilk "Royale" kazinosunun 2027-ci ilin may ayında istifadəyə verilməsi planlaşdırılır. Bu barədə "Agalarov Development" şirkətinin prezidenti Emin Ağalarov şənbə günü "Vesti.az" portalına bildirib.
"Kazinonun tikintisi tam sürətlə davam edir və açılış 2027-ci ilin mayına nəzərdə tutulub", – deyə Ağalarov qeyd edib.
Ümumi sahəsi 90 min kvadratmetr olan obyekt Xəzər dənizinin Azərbaycan sektorunda, süni yarımada üzərində inşa edilir. Hündürlüyü 35 metr olacaq bina 12 VIP salon, beynəlxalq poker turnirləri üçün əsas zal, 1500 oyun avtomatı, eləcə də konsert zalı, restoran və kafelərdən ibarət olacaq.
Məlumata görə, potensialına görə Avropanın ən böyük kazinolarından biri olmağa namizəd göstərilən məkana giriş 21 yaşdan yuxarı şəxslər üçün nəzərdə tutulub.
