Bakı. Trend:
Süni intellektin öz surətlərini müstəqil şəkildə yaradaraq evlərdəki internetə qoşulmuş cihazlar vasitəsilə yayılması üçün cəmi bir neçə ay kifayət edə bilər. "Anthropic" şirkəti belə bir ehtimalla bağlı xəbərdarlıq edib.
CNBC-nin məlumatına görə, şirkətin proqnozuna əsasən, kiçik süni intellekt modelləri ağıllı sobalara, Android TV qurğularına və internetə qoşulan digər cihazlara nüfuz edə, onların hesablama resurslarından istifadə edərək öz surətlərini yarada bilər.
Belə bir süni intellektin fəaliyyətini dayandırmaq xüsusilə çətin ola bilər. Buna səbəb sistemin vahid idarəetmə mərkəzinin olmaması və müxtəlif cihazlar arasında yayılmaq imkanına malik olmasıdır.
Bununla belə, hazırda nəzarətsiz şəkildə çoxala bilən, tam avtonom süni intellekt sisteminin mövcud olmadığı bildirilir.
Anthropic gələcəkdə belə sistemlərin meydana çıxa biləcəyini gözləyir. Şirkət xəbərdarlıq edir ki, yavaş-yavaş öz surətlərini yaradan süni intellekt sistemləri daha təhlükəli modellərin xəbərçisi ola bilər. Gələcəkdə bu modellər qorunan serverlərə müdaxilə etmək və giriş açarlarını ələ keçirmək imkanına yiyələnə bilər.
