Bakı. Trend:
ABŞ Maliyyə Nazirliyi çirkli pulların yuyulmasına qarşı mübarizə tədbirlərinin görülməməsi və sanksiyaların pozulması ittihamları ilə “Bank of America”nı 1,21 milyard dollar məbləğində cərimələyib.
Nazirliyin mətbuat xidmətinin oktyabrın 13-də yaydığı bəyanata əsasən, ABŞ federal hökuməti “bankın milli təhlükəsizlik təhdidlərini azaltmaq iqtidarında olmaması ilə əlaqədar 1,2 milyard dollar məbləğində cərimə tətbiq edib”. Sənəddə “Çin şəbəkələri”nə aid edilən çirkli pulların yuyulması və qanunsuz maliyyə əməliyyatlarından bəhs olunur.
“Bank of America” çirkli pulların yuyulmasına qarşı mübarizəni nəzərdə tutan federal qanunların tələblərinə əməl etmədiyinə görə əlavə 750 milyon dollar da ödəməli olacaq.
ABŞ Maliyyə Nazirliyinin bəyanatında qeyd olunur ki, bank ümumilikdə təxminən 5 milyard dollar məbləğində çirkli pulların yuyulması hallarının qarşısını almayıb və bu barədə ABŞ hakimiyyət orqanlarına məlumat verməyib.
