Hindistanın Uttarakhand əyalətində mülki vertolyotun qəzaya uğraması nəticəsində altı nəfər həlak olub. Vertolyotla əlaqə havaya qalxdıqdan cəmi iki dəqiqə sonra kəsilib və qalıqlar tapılıb. Pilotun ölənlər arasında olduğu təsdiqlənib.
Tezadlar.az xəbər verir ki, Hindistanın şimalında baş verən vertolyot qəzası ölümlə nəticələnib. Mülki vertolyot Uttarakhand əyalətinin Çamoli bölgəsindəki Coşimat şəhəri yaxınlığında hələlik müəyyən edilməmiş bir səbəbdən qəzaya uğrayıb. Qəzadan sonra əraziyə axtarış-xilasetmə qrupları göndərilib.
Çamoli Polis Rəisi Surjit Sinqh Panvar vertolyotun yerli vaxtla saat 13:12-də havaya qalxdığını, lakin əlaqənin saat 13:14-də kəsildiyini bildirib.
Vertolyotla əlaqə saxlanıla bilmədikdən sonra ərazidə axtarış-xilasetmə əməliyyatı başlayıb.
Xilasetmə qruplarının səylərindən sonra vertolyotun qalıqları tapılıb. Araşdırmalar nəticəsində pilot da daxil olmaqla 6 nəfərin həyatını itirdiyi məlum olub.
Qəzanın səbəbi ilə bağlı hələlik rəsmi açıqlama verilməsə də, araşdırmanın başlandığı bildirilib.
ELBAR
