Bişkekdə dövlət və bələdiyyə müəssisələrinin, eləcə də məktəblərin, kolleclərin və universitetlərin işçiləri 5 oktyabrda məsafədən işləyəcəklər.
Müvafiq sərəncam Qırğızıstan Prezidenti Sadır Japarov tərəfindən imzalanıb.
Qırğız KİV-nin məlumatına görə, bu qərar Beynəlxalq Müəllimlər Gününün qeyd edilməsi və “Bişkek Arena” milli stadionunun təntənəli açılışı ilə əlaqədar paytaxtın nəqliyyat infrastrukturundakı tıxacları azaltmaq üçün qəbul edilib.
Onlayn iş qrafiki mülkiyyət formasından asılı olmayaraq məktəb, ibtidai, orta və ali peşə təhsili proqramlarını həyata keçirən dövlət və bələdiyyə müəssisələrinin və qurumlarının, eləcə də təhsil təşkilatlarının işçilərinə şamil edilir.
Həmin gün üçün orta gündəlik əmək haqqı saxlanılacaq.
Lakin məsafədən iş qrafiki uşaq bağçalarının, səhiyyə müəssisələrinin, yaxud kommunal xidmətlərin və şəhərin həyat təminatı sisteminin fasiləsiz fəaliyyətini təmin edən müəssisə və xidmətlərin işçilərinə şamil edilmir.
Artıq ölkənin Təhsil Nazirliyinə və Elm, Ali Təhsil və İnnovasiya Nazirliyinə sərəncamın icrası üçün lazımi tədbirləri görmək tapşırılıb.
JASMİN