BAKI, 21 oktyabr. TELEQRAF
İraq hökuməti İranla sərhəddə yerləşən keçid məntəqələrinin əksəriyyətinin növbəti qəraradək bağlanması barədə göstəriş verib.
Teleqraf xəbər verir ki, bu barədə İraqın “Shafaq News” informasiya portalı məlumatlı mənbəyə istinadən xəbər yayıb.
Məlumata görə, qərara səbəb sentyabr ayında İraq ərazisindən Səudiyyə Ərəbistanına həyata keçirilən hücumlarda İranın mümkün iştirakına dair Bağdadın əldə etdiyi iddia olunan sübutlardır.
Mənbə sərhəd-keçid məntəqələrinin bağlanması barədə göstərişin şəxsən İraqın Baş naziri Əli əz-Zeydi tərəfindən verildiyini bildirib.
İraq hakimiyyəti İranın Səudiyyə Ərəbistanının Şərq–Qərb neft kəmərinə endirilən zərbədə iştirakından, həmçinin hücumlarda istifadə olunan pilotsuz uçuş aparatlarının yığılması üçün zəruri hissələrin sərhədyanı ərazilərə göndərilməsindən şübhələnir.
Hələlik nə İraq, nə də İran rəsmiləri yayılan məlumatlara münasibət bildiriblər.
Qeyd edək ki, sentyabrın 11-də Səudiyyə Ərəbistanının Şərq–Qərb neft kəmərinə pilotsuz uçuş aparatları ilə hücum edilib. Ertəsi gün İraqın Baş naziri dronların Meysan vilayətindən buraxıldığına dair məlumatların təsdiqlənməsindən sonra bölgənin əməliyyat komandanını vəzifəsindən uzaqlaşdırıb.
