BAKI, 25 oktyabr. TELEQRAF
İran Hörmüz boğazını açmaq müqabilində ABŞ-dən İran limanlarına tətbiq edilən blokadanın aradan qaldırılmasını istəyib.
Teleqraf xəbər verir ki, bu barədə “Al Arabiya” telekanalı mənbələrinə istinadən məlumat yayıb.
Məlumata görə, Tehran hərbi və iqtisadi təzyiqlərin artdığı bir vaxtda Pakistan vasitəsilə Vaşinqtona danışıqları bərpa etməyə hazır olduğunu çatdırıb. Bu addım İranın böhranın diplomatik yolla həllinə qayıtmağa hazır olduğuna işarə kimi qiymətləndirilir.
ABŞ-nin təklifə münasibəti hələlik məlum deyil. Həmçinin tərəflər arasında danışıqların nə vaxt bərpa oluna biləcəyi barədə də məlumat yoxdur.
İranın Pakistandakı səfiri Rza Miri Müqəddəm də Tehranın Vaşinqtonla danışıqları davam etdirməyə hazır olduğunu bildirib.
