Samsung 2027 üçün Galaxy S27, qatlanan telefon və XR eynəyi planlayır

    “Samsung” son maliyyə hesabatını müzakirə edərkən 2027-ci il üçün ilkin planlarını açıqlayıb. Buraya “Galaxy S27” seriyası, yeni qatlanan cihazlar və “Android XR” eynəyi daxildir. Şirkət növbəti S seriyasında modellər arasındakı fərqləri daha aydın göstərmək istəyir. Açıqlama yaddaş bazarındakı böhranın davam etdiyi və mobil bölmənin yenidən əməliyyat zərəri ilə üzləşdiyi vaxta təsadüf edib.    Mobil bölmənin vitse-prezidenti Daniel Araujo ilin sonundakı yüksək satış mövsümündə əsas “Galaxy” cihazları üçün reklam kampaniyalarının keçiriləcəyini deyib. Uzun müddətdir gözlənilən “Android XR” smart eynəyinin də ilin sonunadək çıxması planlaşdırılır. Ancaq ilk modelin dəqiq satış planını nə “Samsung”, nə də “Google” hələ təsdiqləyib.    “Samsung” 2027-ci ildə növbəti S seriyasını fərqli istifadəçi qruplarına uyğun yeniləmək istəyir. Hər modelin özünəməxsus tərəfləri daha çox önə çıxarılacaq, amma “Galaxy S27” modelləri arasındakı konkret fərqlər hələ açıqlanmayıb. “Galaxy AI” funksiyalarının da təkmilləşdirilməsi planlaşdırılır. Məqsəd süni intellektin istifadəçinin vəziyyətini və nə etmək istədiyini daha yaxşı anlamasıdır.    Qatlanan smartfonlarda əsas diqqət istifadə rahatlığına yönələcək. “Samsung” 2027-ci ilədək daha nazik və yüngül qatlanan cihazlar hazırlamaq, onların formasını gündəlik istifadəyə daha uyğun etmək istəyir. Gələcək planlarda “Glass”, “TriFold” və tamamilə yeni quruluşda başqa cihazlar da var.    “Galaxy S27” olduğu düşünülən bir neçə “Samsung” cihazı Danimarkadakı “UL Solutions” sertifikat bazasında görünüb. Bütün sənədlərdə 9 V və 2,77 A göstəriciləri qeyd edilib. Bu, 24,93 Vt gücə bərabərdir və modellərin 25 Vt naqilli şarjı dəstəkləyəcək cihazlar kimi satışa çıxacağını göstərir. Beləliklə, baza modelinin naqillə şarj sürətinin artmayacağı ehtimalı yüksəlib.    Bundan əvvəl “SM-S9520” kodlu cihaz keçən ay 3C sertifikatı almış və 25 Vt şarj gücü ilə qeydə düşmüşdü. Fevralda təqdim olunan “Galaxy S26” da 25 Vt naqilli, 15 Vt simsiz şarjı dəstəkləyir. “Galaxy S27” modelində simsiz şarj gücünün dəyişməyəcəyi gözlənilir, amma məlumat hələ təsdiqlənməyib. Telefonda “Galaxy S26”dakı kimi 4300 mAh tutumlu batareyanın olub-olmayacağı da bilinmir.