Amazon 170 manatdan başlayan 5 yeni Alexa ağıllı ev cihazı təqdim etdi

    “Amazon” 28 oktyabrda “Alexa” ilə işləyən 5 yeni ağıllı ev cihazını göstərib. Siyahıya “Echo Dot”, “Echo Studio with Home Camera”, “Echo Time”, “Alexa Photo Frame” və “Echo Show 16” daxildir. İlk 4 model artıq satılır, “Echo Show 16” üçün isə ön sifariş verə bilərsiniz. 16 düymlük ekranlı modelin göndərilməsi ilin sonuna yaxın başlayacaq. Dəqiq tarix hələ açıqlanmayıb.    Yeni “Echo Dot” daxili ağıllı ev mərkəzi sayəsində “Zigbee”, “Matter” və “Thread” standartlarına uyğun cihazları idarə edir. “eero” şəbəkə genişləndiricisi evdəki internet bağlantısının əhatə dairəsini təxminən 93 m² böyüdür. Modeldə “AZ3” prosessoru, 4 mikrofon və 50% daha güclü bas səsi var. “Echo Dot” 99,99 dollara (təxminən 170 manat), 1 illik “Amazon Kids+” abunəli versiya 109,99 dollara (təxminən 190 manat) satılır.    “Echo Studio with Home Camera” məkan effektli “Dolby Atmos” səsini kamera və otağın quruluşuna uyğun tənzimləyir. Kamera əşyaları tanıyır, göstərilən stolüstü oyunun qaydalarını izah edir və otağa uzaqdan baxmağa şərait yaradır. “Amazon”un sözlərinə görə, kamera görüntünü qeydə almır, yalnız canlı yayımlayır. Yeni model 249,99 dollardır (təxminən 420 manat). Kamerasız əvvəlki versiya 219,99 dollara (təxminən 370 manat) satılır.    Kamerasız “Echo Time” yataq otağı üçün hazırlanmış ağıllı saatdır. Ekran üçün yüzlərlə fərqli görünüş var. “Omnisense” sensoru nəfəsi izləyir və istifadəçini yüngül yuxu mərhələsində, təyin olunan vaxtdan 10 ilə 60 dəqiqəlik aralıqda oyada bilir. Səhərlər ekran günəş işığını təqlid edərək tədricən parlaqlaşır, gecələr isə mavi işığı azaldır. Standart model 199,99 dollardır (təxminən 340 manat). Uşaq versiyası 10 dollar (17 manat) bahadır.    “Alexa Photo Frame” modelində əks olunmanı azaldan 10 düymlük toxunma ekranı var. Cihaz fotoları “Amazon Photos” ilə avtomatik sinxronlaşdırır. Süni intellekt şəkilləri insanlara, məkanlara və fəaliyyətlərə görə qruplaşdırır, ekran görüntülərini bu seçimdən kənarda saxlayır. Şaquli fotolar qara boşluq yaranmasın deyə uyğun şəkillərlə yanaşı göstərilir. Qara model 199,99 dollara (təxminən 340 manat), ağcaqayın və qoz ağacı görünüşlü versiyalar 229 dollara (təxminən 390 manat) satılır.    “Echo Show 16” modelinin “Full HD” ekranında görüntü sahəsi əvvəlki modeldən 10% genişdir. Alüminium çərçivə təxminən 40% nazikləşib. Əlavə “Nanomatte” ekran işıq əksini 90%-dən çox azaldır. Cihazda 10 səsucaldan, 13 MP genişbucaqlı kamera, avtomatik kadr seçimi və gecə görüntüsü var. “Visual ID” tanıma məsafəsi təxminən 2,4 metrdən 5,2 metrə çatıb. Standart versiya 499,99 dollardır (təxminən 850 manat), “Nanomatte” ekranlı model 569,99 dollara (təxminən 970 manat) satılır.    “Echo Show 16” ekranında “Smart Home”, “Family Organizer” və “Photos” görünüşləri arasında keçid etmək olur. Daxili “Fire TV” və qutudakı pult sayəsində cihaz televizor kimi də işləyir. “Alexa Home Map” uyğun “iPhone” ilə otaqları skan edir, işıq, kilid, termostat və kameraları xəritədə göstərir. “Alexa Plus” söhbətləri sonradan baxmaq üçün kartlarda toplayır. Xidmət “Prime” üzvlüyünə daxildir, ayrıca abunə isə ayda 20 dollardır (34 manat). Ön sifarişdə 100 dollar (təxminən 170 manat) endirim var. Ayrı satılan dayaqların qiyməti 70 dollar (119 manat) və 125 dollardır (təxminən 210 manat).