"Netflix" şirkətinin səhmləri rüblük maliyyə nəticələrinin açıqlanmasından sonra 5 faizdən çox ucuzlaşıb.
Sfera.az bildirir ki, buna səbəb investorların platformada izlənmə göstəricilərinin və gəlir artımının yavaşlaması ilə bağlı narahatlıqlarıdır.
Şirkət sentyabrda başa çatan üçüncü rübdə 12,87 milyard dollar gəlir və 3,7 milyard dollar xalis mənfəət əldə edib. Hər iki göstərici investorların gözləntilərini üstələsə də, bu nəticələr bazarda narahatlığı aradan qaldırmayıb.
"Netflix" investorların izlənmə saatlarının artım tempi ilə bağlı narahatlıqlarını qəbul edib. Şirkət bu göstəricini sürətləndirə biləcəyinə əmin olduğunu bildirib.
Netflix son bir neçə rübdə investorların gözləntilərini qarşılamaqda çətinlik çəkir. Platforma digər yayım xidmətləri, oyun sektoru və idman məzmunu ilə rəqabətlə üzləşir.
Şirkətin həmsədri Ted Sarandos bildirib ki, Latın Amerikası, Avropa və Asiyada izlənmə, abunəçi, gəlir və mənfəət göstəriciləri müsbət istiqamətdədir. ABŞ bazarında isə artım şirkətin istədiyi sürətdə deyil.
1 000 nəfər işdən çıxarıla bilər
Media məlumatlarına görə, "Netflix" işçi qüvvəsinin təxminən 6 faizini, yəni 1 000 nəfəri ixtisar etməyi planlaşdırır. Bundan əvvəl televiziya layihələri və məzmun müqavilələrinə cavabdeh olan yeddi yüksək vəzifəli əməkdaşın da şirkətdən ayrıldığı bildirilib.
"Netflix" məzmun siyasətində də dəyişiklik edib. Şirkət məşhur “Stranger Things”, “Bridgerton” və “Squid Game” layihələrinə nəzarət etmiş Bela Bajarianı məzmun üzrə rəhbər vəzifəsində Peter Raysla əvəzləyib. Rays daha əvvəl “Disney” şirkətində çalışıb.
Rəqabət artır, reklam gəlirləri gözləntiləri doğrultmur
"Netflix" abunəçiləri cəlb etmək və mövcud istifadəçiləri saxlamaq üçün canlı idman yayımlarına, oyunlara və qısa formatlı məzmuna daha çox diqqət ayırır. Şirkət Olimpiya Oyunları, dünya çempionatı və digər böyük idman tədbirlərinin yayımlanması istiqamətində də addımlar atır.
Bununla belə, reklam gəlirlərinin artımı da şirkətin gözləntilərindən geri qalır. Netflix-in həmsədri Qreq Piters illik hədəflə müqayisədə müəyyən geriləmənin olduğunu, lakin reklam biznesinin böyüməyə davam etdiyini bildirib.
Şirkət əsas gəlir mənbəyi olan film və televiziya məzmununa investisiyalarını qoruyacağını vurğulayır. Ted Sarandosun sözlərinə görə, Netflix-in xərclərinin təxminən 95 faizi və gəlirlərinin demək olar ki, hamısı bu əsas istiqamətlə bağlıdır.
Fatimə
Sfera.az
