Hollivudun tanınmış aktrisalarından olan Monika Belluççi 62 yaşında da formada olması ilə diqqət çəkir. Məşhur ulduzun fit qalmaq üçün seçdiyi həyat tərzi sərt pəhrizlər və ağır məşqlərdən olduqca uzaqdır.
Sfera.az xəbər verir ki, italiyalı aktrisa sevdiyi makaron və keks kimi qidaları həyatından tamamilə çıxarmadığını bildirib.
O, əsas diqqəti balanslı qidalanmaya və porsiyalara nəzarətə yönəltdiyini deyib.
Belluççi yaxın zamanda “The Telegraph”a verdiyi açıqlamada metabolizmasını aktiv saxlamaq üçün gün ərzində beş dəfə qidalandığını bildirib. Onun gündəlik qida rasionuna səhər, günorta və axşam yeməkləri ilə yanaşı, iki ara yeməyi də daxildir.
Aktrisanın menyusunda tərəvəz, meyvə, yağsız proteinlə zəngin qidalar və zeytun yağı əsas yer tutur. Belluççi həmçinin fındıq və avokado kimi sağlam yağ mənbələrindən istifadə edir. Sevdiyi qidaları tamamilə qadağan etmək əvəzinə onların miqdarına diqqət yetirir. Bu yanaşma sayəsində aktrisa zaman-zaman makaron və keks kimi sevdiyi qidalardan da zövq almağa davam edir.
Monika Belluççinin formada qalmasının sirri yalnız qidalanma ilə məhdudlaşmır. Aktrisa ağır və intensiv məşq proqramları əvəzinə zövq aldığı fiziki fəaliyyətlərə üstünlük verir. O, vaxtaşırı pilateslə məşğul olur, həftədə bir neçə dəfə isə təxminən 45 dəqiqə üzür.
62 yaşlı ulduz yaşlanma prosesinə də təbii yanaşdığını bildirib. Onun sözlərinə görə, insanın 50-60 yaşlarında bədəninin dəyişməsi qaçılmazdır.
İradə Elsevər