Amerikanın “Newsweek” jurnalı Vladimir Zelenskini Ukrayna dövlət başçısı vəzifəsində əvəz edə biləcək dörd potensial namizədin siyahısını dərc edib.
Sfera.az xəbər verir ki, məqalə ABŞ prezidenti Donald Trampın Kiyevdə hakimiyyət dəyişikliyinə çağırışları fonunda yayımlanıb. Nəşr Ukraynanın hazırkı liderinin əsas rəqibi kimi ölkənin keçmiş Silahlı Qüvvələrinin baş komandanı, hazırda isə Ukraynanın Böyük Britaniyadakı səfiri olan Valeri Zalujnını göstərir.
Zalujnı ilə yanaşı, “Newsweek” potensial namizədlər sırasına Ukrayna Müdafiə Nazirliyinin Baş Kəşfiyyat İdarəsinin keçmiş rəhbəri Kirill Budanovu, keçmiş müdafiə naziri Mixail Fedorovu və 2014–2019-cu illərdə bu vəzifəni tutmuş keçmiş prezident Petro Poroşenkonu daxil edib. Jurnalın yazdığına görə, Zelenski 2025-ci ildə Poroşenkoya qarşı milli təhlükəsizliklə əlaqəli əsaslarla, o cümlədən aktivlərinin dondurulmasını nəzərdə tutan sanksiyalar tətbiq etsə də, Poroşenko hazırda müxalifət deputatı olaraq fəaliyyətini davam etdirir.
“Newsweek” jurnalının məqaləsi ABŞ prezidenti Donald Trampın bir gün əvvəl Ukraynada seçkilərin keçirilməsinin zəruriliyi barədə bəyanatından sonra dərc olunub.
“The Wall Street Journal” qəzetinin qeyd etdiyi kimi, Amerika liderinin açıqlamaları onun Zelenski ilə münasibətlərinin 2025-ci ilin qışından bəri ən aşağı səviyyəyə düşdüyünə işarə edir.
Öz növbəsində, “Financial Times” qəzeti adı açıqlanmayan avropalı rəsmilərə istinadən yazır ki, ABŞ prezidentinin administrasiyası Ukrayna üçün silah tədarükü proqramını və kəşfiyyat məlumatlarının paylaşılmasını dayandırmaqla hədələyir. Vaşinqtonla Zelenski arasında münasibətlərin soyuması fonunda Kiyevdə mümkün hakimiyyət dəyişikliyi məsələsi getdikcə daha aydın şəkildə gündəmə gəlir.
