"Wall Street Journal"ın (WSJ) məlumatlı mənbələrə istinadən yaydığı xəbərə görə, ABŞ bir neçə Körfəz ölkəsinə ara seçkilərdən sonra qısa və intensiv hərbi əməliyyatlara hazırlaşmağı tapşırıb.
Sfera.az xəbər verir ki, WSJ-yə danışan rəsmilər bildirib ki, ABŞ ordusu raket müdafiəsini gücləndirmək üçün Texasdan bölgəyə "Patriot" sistemləri göndərir və potensial gərginliyə qarşı bəzi əsgərləri həssas bazalardan köçürür.
Həmçinin bölgədəki ABŞ qüvvələrinin sursat ehtiyatı yenilənir, bombardmançı və qırıcı təyyarələr hücuma hazır vəziyyətə gətirilir. Gələn ay isə əlavə təyyarədaşıyan zərbə qrupu və Dəniz Piyadaları bölməsi Yaxın Şərqdəki təxminən 20 hərbi gəmiyə qoşulacaq.
Mənbələr Prezident Donald Trampın hələ yekun qərar vermədiyini, lakin seçkilərdən sonra İranın infrastrukturunu və nüvə obyektlərini hədəf alan genişmiqyaslı hücuma meylli olduğunu bildirir. Ağ Ev gizli hərbi planları şərh etməsə də, Trampın İranın nüvə silahı əldə etməməsi üçün bütün variantları masada saxladığını vurğulayıb. Qəzetin əvvəlki xəbərlərinə görə, İsrail də yeni hücum planları və hədəfləri hazırlayıb.
Xəbərdə qeyd olunur ki, İsrail Baş naziri Benyamin Netanyahu İranın gücünü zəiflətmək üçün hücumların yenidən başlamasını istəyir. İran isə açıq və gizli xəbərdarlıqlarında istənilən hücuma bölgədəki iqtisadi və mülki hədəfləri vurmaqla sərt cavab verəcəyini bəyan edib. WSJ yazır ki, ABŞ və İsrailin əvvəlki zərbələrinə baxmayaraq, Tehranın hələ də minlərlə raket ehtiyatı var və o, döyüşlərdəki sakitlikdən müdafiəsini gücləndirmək üçün istifadə edib.
Digər tərəfdən, regional vasitəçilər yeni münaqişə dalğasının qarşısını almaq üçün İranla danışıqları bərpa etməyə çalışsalar da, diplomatik səylər hələlik nəticə verməyib.
Vasif
