2026-cı il "World Culinary Awards" mükafatlarının qalibləri arasında aviaşirkətlər, hava limanları və aeroportların biznes-zalları da yer alıb.
Sfera.az bildirir ki, mükafata əsasən, dünyanın ən yaxşı yemək təqdim edən aviaşirkəti Vyetnam Hava Yolları seçilib. Şirkət bu ada layiq görülən ilk Asiya aviaşirkəti olub. O, “Emirates”, “Qatar Airways”, “Singapore Airlines”, “Air France”, “Cathay Pacific” və “Turkish Airlines” kimi rəqiblərini geridə qoyub.
Digər mükafatlar isə Londonun Hitrou hava limanına, “Turkish Airlines” aviaşirkətinin beynəlxalq biznes-zallarına və Qatvik hava limanının Cənub terminalındakı “Clubrooms” məkanına verilib.
Vyetnam Hava Yollarının menyusunda nələr var?
Vyetnam mətbəxini dünyaya tanıtmağı hədəfləyən aviaşirkət sərnişinlərə mövsümə və uçuş istiqamətinə uyğun menyular təqdim edir. Şirkət bununla hər uçuşda fərqli kulinariya təcrübəsi yaratmağa çalışır. Ekonom sinifdə səhər yeməyinin diqqətçəkən təamlarından biri qat-qat xırtıldayan kruassandır. Nahar və şam yeməyində isə düyü və spagetti yeməkləri, souslar, desert və çörək təqdim olunur.
Biznes sinif sərnişinləri isə uçuş istiqamətindən asılı olaraq müxtəlif ölkələrin mətbəxindən təamlar seçə bilirlər. Cənubi Koreyaya uçuşlarda bibimbap adlı qarışıq qızardılmış düyü, jenşenli toyuq şorbası və qara lobya souslu əriştə menyuya daxil edilir.
Avropa istiqamətində uçan sərnişinlərə isə Fransa, Almaniya və Britaniya mətbəxindən yeməklər təklif olunur. Avropa, Avstraliya və ABŞ istiqamətlərinə biznes siniflə səyahət edənlər yeməklərini əvvəlcədən sifariş edə bilirlər.
Ən yaxşı yemək məkanına sahib hava limanı
Londonun Hitrou hava limanı 2026-cı ildə dünyanın yemək məkanları baxımından ən yaxşı hava limanı seçilib. O, Dubay Beynəlxalq Hava Limanı, Qətərdəki Həməd Beynəlxalq Hava Limanı, Honkonq Beynəlxalq Hava Limanı, Nyu-Yorkdakı Con Kennedi Beynəlxalq Hava Limanı, Paris aeroportları və Sinqapurun Çanqi hava limanını qabaqlayıb.
Hitrounun dörd terminalında sərnişinlər kafe, rahat yemək məkanları və müxtəlif ölkələrin mətbəxini təqdim edən restoranlar arasından seçim edə bilərlər.
Terminal 2-də yerləşən “Le Café Louis Vuitton” kimi məkanlarda daha fərqli kulinariya təcrübəsi təqdim olunur. Burada fındıqlı desertlər və brendin simvolik çiçək motivləri ilə bəzədilən şirniyyatlar da var.
Terminal 5-də isə məşhur aşpaz Qordon Ramsinin “Plane Food Market” restoranında günboyu səhər yeməyi, pizza, suşi, əriştə və Britaniya mətbəxinin ənənəvi yeməklərindən olan balıq və kartof təqdim edilir.
Ən yaxşı aviaşirkət biznes-zalı
“Turkish Airlines”ın beynəlxalq biznes-zalları yemək təqdimatına görə dünyanın ən yaxşı aviaşirkət zalı seçilib.
Namizədlər arasında Parisin Şarl de Qoll hava limanındakı “Air France La Première”, Əbu-Dabidəki “Etihad Airways” birinci sinif zalı, Frankfurt hava limanındakı “Lufthansa” zalı və digər beynəlxalq məkanlar da olub.
“Turkish Airlines”ın beynəlxalq zallarında qonaqlara türk və dünya mətbəxindən isti və soyuq yeməklər təqdim olunur.
Ən yaxşı aeroport istirahət zalı
Londonun Qatvik hava limanının Cənub terminalında yerləşən “Clubrooms” 2026-cı ilin yemək təqdimatı üzrə ən yaxşı aeroport istirahət zalı seçilib.
Məkanın menyusu mövsümə uyğun yenilənir. Sərnişinlər burada isti və soyuq yeməklərlə yanaşı, yüngül qəlyanaltılar da tapa bilərlər. Səhər yeməyində benedikt yumurtası və Belçika vafliləri, axşam menyusunda isə toyuqlu Sezar salatı, Koreya sousunda toyuq və limonlu zeytun yağı ilə hazırlanan Mərakeş üslublu tərəvəz yeməyi yer alır.
Fatimə
Sfera.az
