Sinqapurda bir su anbarında timsahın olduğunu göstərən fotoşəkil səlahiyyətli qurumları hərəkətə keçirib. İki günlük axtarışdan sonra görüntünün süni intellekt vasitəsilə hazırlandığı məlum olub. Fotonu paylaşan 30 yaşlı şübhəli şəxsi 10 ilədək həbs cəzası gözləyir.
Qaynarinfo xəbər verir ki, Sinqapur parklarından birində iki gün ərzində timsah axtarışlarına səbəb olan fotoşəklin gerçək olmadığı üzə çıxıb. Süni intellektlə hazırlanmış görüntüyə görə su fəaliyyətləri dayandırılıb. Hadisənin arxasında olduğu bildirilən 30 yaşlı Ye Lin isə 10 ilədək həbs cəzası riski ilə üzləşib.
Myanma vətəndaşı Ye Linin paylaşdığı fotoşəkildə məşhur parkdakı su anbarında timsahın olduğu təəssüratı yaradılıb. Görüntü səlahiyyətli şəxslərə çatdıqdan sonra təhlükəsizlik tədbirləri görülüb və ərazidə bütün su fəaliyyətləri dayandırılıb. Qruplar iki gün ərzində su anbarında axtarış aparsalar da, heç bir timsah aşkar etməyiblər.
Fotoşəklin daha sonra süni intellektdən istifadə edilməklə hazırlandığı müəyyənləşdirildikdən sonra məsələ polisə həvalə olunub. Ye Lin ilkin mərhələdə saxta görüntü paylaşmaqda ittiham edilib. Sinqapur qanunvericiliyinə əsasən, bu əmələ görə 3 ilədək həbs və təxminən 7 800 dollara qədər cərimə nəzərdə tutulur.
“Gemini”ni silməsi yeni ittihama səbəb olub
İstintaq zamanı ortaya çıxan yeni məlumat işi daha da ağırlaşdırıb. Ye Linin saxta timsah görüntüsünü və fotoşəklin hazırlanması üçün istifadə etdiyi “Gemini” tətbiqini izləri aradan qaldırmaq məqsədilə sildiyi müəyyənləşdirilib.
Bundan sonra ona ədalət mühakiməsinin həyata keçirilməsinə mane olmaq ittihamı da irəli sürülüb. Sinqapurda bu əməl ayrıca 7 ilədək əlavə həbs cəzası riski yaradır.
İki ittiham birlikdə nəzərdən keçirildikdə Ye Linin üzləşdiyi həbs cəzasının müddəti 10 ilədək çata bilər. Bundan əlavə, ona pul cəriməsi də tətbiq oluna bilər. Şübhəlinin məhkəmə prosesi isə hələ başa çatmayıb.
Aydın