“Kredit Evi” ASC 15 milyon 300 min manat dəyərində daşınmaz əmlakın alınması ilə bağlı qərar qəbul edib.
Marja.az xəbər verir ki, qərar şirkətin səhmdarlarının 23 oktyabr 2026-cı il tarixində keçirilmiş növbədənkənar ümumi yığıncağında verilib.
Şirkətin açıqlamasına əsasən, səhmdarlar daşınmaz əmlakın alınması məqsədilə xüsusi əhəmiyyətli əqdin bağlanmasını təsdiqləyiblər.
Alınması nəzərdə tutulan daşınmaz əmlakın yerləşdiyi ünvan, ümumi sahəsi, təyinatı və satıcı tərəf barədə məlumat açıqlanmayıb.
"“Kredit Evi” ASC səhmdarlarının 23 Oktyabr 2026-cı il tarixli Növbədənkənar Ümumi Yığıncağında 15 300 000 (on beş milyon üç yüz min) manat dəyərində daşınmaz əmlakın alışı məqsədilə xüsusi əhəmiyyətli əqdin bağlnaması haqqında qərar qəbul edilmişdir",- Şirkətin bildirişində deyilir.
Həmçinin əməliyyatın hansı maliyyə mənbələri hesabına həyata keçiriləcəyi və əmlakın şirkətin gələcək fəaliyyətində hansı məqsədlə istifadə olunacağı məlum deyil.
Qeyd edək ki, xüsusi əhəmiyyətli əqdlər şirkətin maliyyə vəziyyətinə və aktivlərinin strukturuna mühüm təsir göstərə bilən iri əməliyyatlardır.
“Kredit Evi” ASC-nin açıqlamasında 15 milyon 300 min manatlıq daşınmaz əmlak alışının faktiki tamamlandığı deyil, həmin məqsədlə xüsusi əhəmiyyətli əqdin bağlanması barədə səhmdarların qərar qəbul etdiyi bildirilir.
