ABŞ-ın sabiq dövlət katibi Hillari Klinton Rusiya prezidenti Vladimir Putinin ABŞ prezidenti Donald Tramp haqqında kompromat xarakterli foto və videolara malik olduğuna inandığını bildirib.
Lent.az xəbər verir ki, o, bu barədə jurnalist Kara Svayşerlə birlikdə aparıcılıq etdiyi “High Stakes” podkastında danışıb.
Klinton iddia edib ki, Trampın Putinlə münasibətləri və Rusiyanın onun seçkilərdə qələbəsinə yardım etməsi ilə bağlı çoxsaylı suallar var.
O, həmçinin Cefri Epşteynlə bağlı sənədlər tam açıqlananda Trampın tərəfdarlarının belə oradakı məlumatlardan şoka düşə biləcəyini söyləyib.
Klintonun fikrincə, Trampın Rusiya ilə münasibətlərində şəxsi və iqtisadi maraqlar da mühüm rol oynayır.
Qeyd edək ki, Putinin Trampa aid foto və videolara malik olması barədə iddia Klintonun şəxsi qənaətidir və xəbərdə bunu təsdiqləyən müstəqil sübut təqdim edilmir.
