İrlandiyalı MMA döyüşçüsü, UFC-nin iki çəki dərəcəsində keçmiş çempionu Konor Makqreqor peşəkar karyerasını başa vurmağa hazırlaşır.
İdman.Biz xəbər verir ki, 38 yaşlı idmançı bu barədə “X” sosial şəbəkəsində paylaşım edib.
Makqreqor növbəti qarşılaşmasının onun üçün sonuncu olacağını bildirib. O, vida döyüşündə azarkeş marağı və ödənişli yayımların satış göstəriciləri baxımından öz rekordlarını yeniləmək niyyətindədir.
İrlandiyalı döyüşçü meksikalı boksçu Saul Alvaresin qarşılaşmalarının kommersiya göstəricilərinə də münasibət bildirib.
“Kanelo döyüşü nə qədər izləyici topladı? Arenada neçə nəfər var idi? Nə qədər gəlir əldə olundu? Mən bu göstəricilərdə onların hamısını qabaqlayıram. Növbəti döyüşümü tanıtmaq üçün həqiqətən çalışacağam. Bu, mənim sonuncu döyüşüm olacaq. Görək, hansı rəqəmlərə nail ola biləcəyəm. Öz rekordlarımı yeniləməyə davam etmək istəyirəm”, - deyə Makqreqor yazıb.
İdmançı hazırda dizindən aldığı zədədən sonra bərpa prosesini davam etdirir. Onun 2027-ci ildə UFC-nin Beynəlxalq Döyüş Həftəsi çərçivəsində oktaqona qayıtmağı hədəflədiyi bildirilir.
Makqreqor sonuncu dəfə 11 iyul 2026-cı ildə Las-Veqasda təşkil olunan UFC 329 turnirində Maks Holloueylə qarşılaşıb. Görüşün ilk raundunda dizindən zədələnən irlandiyalı döyüşçü texniki nokautla məğlub olub.
Qeyd edək ki, Makqreqor peşəkar MMA karyerasında 22 qələbə qazanıb və yeddi dəfə uduzub. O, UFC tarixində eyni vaxtda iki fərqli çəki dərəcəsində çempionluq kəmərinə sahib olan ilk döyüşçüdür.
