Sloveniyanın paytaxtı Lyublyana şəhərində Avropa Stolüstü Tennis Birliyinin (ASTB) konqresi keçirilir.
İdman.Biz xəbər verir ki, bu barədə Azərbaycan Stolüstü Tennis Federasiyası (ASTF) məlumat yayıb.
Bildirilib ki, ASTF-nin baş katibi Könül Mikayılovanın da qatıldığı konqresin gündəliyində bir sıra mühüm məsələlər yer alıb. ASTB prezidentinin açılış nitqindən sonra quruma üzv assosiasiyaların iştirakı təsdiqlənəcək, müvafiq komissiyaların və konqres sədrinin təyin edilməsi, gündəliyin təsdiqi, yeni üzvlük müraciətlərinə baxılması və təşkilatın illik fəaliyyət hesabatı müzakirə ediləcək.
Gündəlikdə, həmçinin, ASTB-nin strateji icra planı, 2025-ci ilin maliyyə və audit hesabatları, 2027-ci il üçün büdcə, auditorların təyin edilməsi, müxtəlif təklif və qətnamələr, eləcə də Audit Komissiyasının üzvlüyünə seçkilər də yer alıb.
Konqresdə ötənilki toplantıdan sonra İcraiyyə Şurasının gördüyü işlərin təsdiqi, fəxri üzvlərin təyin edilməsi və fəxri nişanların təqdim olunması məsələlərinin də müzakirəsi planlaşdırılır.
Bununla yanaşı, 2027-ci ildə keçiriləcək Avropa çempionatlarının təqdimatı, növbəti konqresin keçiriləcəyi yer və tarixin müəyyənləşdirilməsi, eləcə də digər məsələlər nəzərdə tutulub.
