Beynəlxalq Futbol Assosiasiyaları Şurası (IFAB) sabiq tanınmış mütəxəssis Arsen Vengerin təşəbbüsü ilə tətbiq olunan yeni ofsayd qaydalarının sınaq nəticələrini nəzərdən keçirib.
Futbolpress.az xəbər verir ki, Kanada Premyer Liqasında cari ildə həyata keçirilən təcrübə birmənalı qarşılanmayıb. Vengerin ideyasına əsasən, futbolçu yalnız rəqib müdafiəçini tam üstələdiyi təqdirdə ofsayd vəziyyətində hesab olunur. Əgər bədənin hər hansı hissəsi xətdə qalırsa, oyun davam edir.
“BBC Sport”un məlumatına görə, 112 qarşılaşmanın statistikası göstərib ki, yeni qayda sayəsində ofsaydların sayı 54% azalıb, vurulan qolların miqdarı isə 13 vahid artıb. Buna baxmayaraq, müdafiə xəttinin orta hesabla 3 metr irəli çəkilməsi və ekspertlər arasında yetərli dəstəyin olmaması layihənin gələcəyini sual altına qoyub.
IFAB qurumun hələlik qəti imtina qərarı vermədiyini, məsələnin müzakirəsinin 14 yanvar 2027-ci ildə Zürixdə keçiriləcək növbəti iclasda davam etdiriləcəyini açıqlayıb.
