Avropanın yeni nəsil döyüş təyyarəsinin hazırlanması ilə bağlı planlarda dəyişiklik baş verə bilər. Airbus şirkətinin baş icraçı direktoru Giyom Fori Fransa və Almaniyanın birgə qırıcı təyyarə layihəsinin uğursuzluqla nəticələnməsindən sonra Almaniyanın Böyük Britaniya, Yaponiya və İtaliyanın iştirak etdiyi yeni beynəlxalq proqrama qoşulmasının mümkün variantlardan biri olduğunu açıqlayıb.
Airbus Fransa-Almaniya birgə layihəsində Almaniya və İspaniyanı təmsil edirdi. Şirkətin rəhbəri bildirib ki, layihənin dizayn məsələlərində tərəflər arasında razılıq əldə olunmadığı üçün uğursuzluğa düçar olmasından sonra Almaniya hökuməti alternativ əməkdaşlıq imkanlarını araşdırır.
Forinin sözlərinə görə, Almaniyanın Böyük Britaniya, Yaponiya və İtaliyanın birgə həyata keçirdiyi Qlobal Döyüş Hava Proqramına (GCAP) qoşulması nəzərdən keçirilən variantlardan biridir. Bununla belə, Berlin üçün başqa seçimlər də mövcuddur.
Yeni döyüş təyyarəsi 2035-ci ildə istifadəyə verilə bilər
Böyük Britaniya, Yaponiya və İtaliya GCAP çərçivəsində yeni nəsil qırıcı təyyarənin hazırlanması üçün indiyədək 5,5 milyard dollardan çox vəsait ayırıblar. Layihənin məqsədi təyyarəni 2035-ci ilədək istifadəyə verməkdir. Kanada da proqrama müşahidəçi ölkə qismində qoşulub.
Airbus rəhbəri Almaniya və İspaniya hökumətləri ilə yeni döyüş təyyarəsinin gələcəyi barədə əməkdaşlıq etdiklərini bildirib. Onun fikrincə, bu təyyarə Avropada və Avropanın ehtiyacları üçün hazırlanmalıdır.
Fori Avropa ölkələrinin birgə əməkdaşlığı əsasında altıncı nəsil döyüş təyyarəsinin yaradılmasını dəstəklədiklərini vurğulayıb. O, Airbus-ın da Avropa üçün nəzərdə tutulan bu layihənin bir hissəsi olmaq istədiyini qeyd edib.
Şirkət rəhbəri yekun qərarın hökumətlər tərəfindən veriləcəyini bildirib. Onun sözlərinə görə, qərarın mümkün qədər yaxın gələcəkdə qəbul edilməsi arzuolunandır.
Fransa və Almaniyanın birgə layihəsi niyə baş tutmadı?
Fransa ilə Almaniyanın ortaq döyüş təyyarəsi hazırlamaq təşəbbüsü layihənin dizaynı ilə bağlı fikir ayrılıqları səbəbindən dalana dirənib. Fransanın Dassault Aviation şirkəti Airbus və Almaniya tərəfi ilə razılığa gələ bilmədikdən sonra iyun ayında birgə təşəbbüsün uğursuzluğu məlum olub.
Bundan sonra Dassault Aviation Fransa dövləti ilə birlikdə ayrıca proqram həyata keçirmək qərarına gəlib. Yeni layihə gələcəkdə Fransanın Rafale qırıcılarını əvəz edə biləcək təyyarənin hazırlanmasını nəzərdə tutur.
Beləliklə, Avropanın gələcək döyüş aviasiyasının hansı ölkələrin iştirakı ilə formalaşacağı hələ də açıq qalır. Almaniyanın GCAP proqramına qoşulub-qoşulmayacağı və Airbus-ın gələcək layihədə hansı rolu oynayacağı barədə son qərar hökumətlərdən asılı olacaq.
\\ Aydan Bünyatova, Editor.az
