ABŞ dövlət katibi Marko Rubio Efiopiya və Eritreya arasında artan gərginliyin diplomatik yollarla aradan qaldırılmasına çağırıb.
Editor.az xəbər verir ki, Associated Press-in məlumatına görə, Vaşinqton Afrika Buynuzu regionunda yeni hərbi qarşıdurmanın yaranmasından narahatdır.
Rubio Efiopiyanın baş naziri Abiy Əhmədlə telefon danışığı zamanı tərəfləri dialoqa üstünlük verməyə və 2018-ci ildə əldə edilmiş sülh razılaşmasının prinsiplərinə əməl etməyə çağırıb.
Gərginliyin əsas səbəblərindən biri Efiopiyanın şimalındakı Tiqray bölgəsində döyüşlərin yenidən alovlanmasıdır.
Efiopiya Eritreyanı sərhəd ərazilərində hərbi qüvvələr yerləşdirməkdə ittiham edir. Eritreya isə Efiopiyanın bəyanatlarını müharibə təhlükəsini artıran addım kimi qiymətləndirir.
İnsan Hüquqları Müdafiəsi Təşkilatının məlumatlarına əsasən, Tiqrayın cənubunda atəşə tutulma nəticəsində mülki şəxslərin öldüyü və yaralandığı barədə məlumatlar daxil olub. Döyüşlər bəzi səhiyyə müəssisələrinin fəaliyyətinə də mane olub. Atəşə tutulan ərazilərə görə məsuliyyət məsələsi isə müstəqil şəkildə təsdiqlənməyib.
Münaqişənin arxasında regional təhlükəsizliklə yanaşı, Efiopiyanın Qırmızı dənizə çıxış əldə etmək istəyi də dayanır. Eritreya 1993-cü ildə müstəqillik qazandıqdan sonra Efiopiya dənizə birbaşa çıxışı olmayan ölkəyə çevrilib.
ABŞ-ın diplomatik təşəbbüsləri regionda gərginliyin azaldılmasına yönəlib. Bununla belə, qarşılıqlı ittihamlar və sərhəd məsələləri tərəflər arasında münasibətlərin normallaşmasını çətinləşdirir.
