Azərbaycanda 2025-ci ildə 20 mindən çox boşanma qeydə alınıb. Boşanmaların əhəmiyyətli hissəsi nikahın ilk illərinə təsadüf etsə də, 10 ildən artıq davam edən nikahların pozulması da geniş yayılıb.
Banker.az saytının verdiyi məlumata görə, 2025-ci ildə ölkədə 20 675 boşanma qeydə alınıb. Onlardan 5 795-i nikahın beş ildən az davam etdiyi ailələrdə baş verib. Bu, bütün boşanmaların təxminən 28 faizinə bərabərdir.
Nikahı 5–9 il davam etmiş ailələr arasında 4 845, 10–19 il davam etmiş ailələr arasında isə 7 354 boşanma qeydə alınıb. Nikahın müddəti 20 il və daha çox olan ailələrdə boşanmaların sayı 2 681 təşkil edib.
Beləliklə, 2025-ci ildə qeydə alınmış bütün boşanmaların 51,5 faizi nikahın ilk on ilində baş verib. Digər tərəfdən, boşanmaların ən böyük hissəsi – 35,6 faizi – nikahı 10–19 il davam etmiş ailələrin payına düşüb.
Yaş qrupları üzrə göstəricilər də diqqət çəkir. Boşanan qadınlar arasında ən böyük qrup 30–34 yaşlılar olub – 5 072 nəfər. Kişilər arasında isə ən yüksək göstərici 35–39 yaş qrupunda qeydə alınıb – 4 844 nəfər.
Qeyd edək ki, bu məlumatlar il ərzində qeydə alınmış boşanmaların nikah müddətinə görə bölgüsünü göstərir. Ayrı-ayrı müddətlər üzrə nikahların boşanma ehtimalını müəyyənləşdirmək üçün həmin kateqoriyalardakı mövcud nikahların ümumi sayı da nəzərə alınmalıdır.
