Yunanıstanın Dodekanes arxipelaqında yerləşən Strongylo adası 5 milyon dollar ilkin qiymətlə satışa çıxarılıb.
Axar.az Globalinfo.az-a istinadən xəbər verir ki, Egey dənizində yerləşən ada şəxsi mülklərin satışı üzrə ixtisaslaşmış beynəlxalq daşınmaz əmlak platformasında siyahıya daxil edilib.
Strongylo adası toxunulmamış təbiəti və üç təbii çimərliyi ilə diqqət çəkir. Yunanıstan mediasının məlumatına görə, ərazi həm lüks yaşayış məkanı, həm də turizm sahəsinə investisiya yatırmaq istəyənlər üçün əlverişli hesab olunur.
Təxminən 219 min kvadratmetr əraziyə malik ada Lipsi adasının şimalında, Arki adaları qrupunda yerləşir. Patmos və Leros adalarına yaxın olsa da, Strongyloya yalnız dəniz yolu ilə çatmaq mümkündür.
Qeyd edək ki, ada əvvəllər məşhur aktyor Conni Depplə bağlı xəbərlərdə də gündəmə gəlib.
