İranın yarı-rəsmi “FARS” agentliyinin məlumatına görə, supertanker oktyabrın 1-də Hörmüz boğazında, Oman sahilləri yaxınlığında naməlum mərmi ilə vurulub. Agentlik gəminin naviqasiya qaydalarını “pozduğunu” bildirib.
“FARS” oktyabrın 2-də yazıb ki, 2,5 milyon barel neft tutumuna malik tanker Oman sahillərindən təxminən 8 kilometr aralıda vurulub və boğazın cənubundakı “icazəsiz” marşrutdan istifadə edərkən yanmağa başlayıb.
SEPAH-a yaxın “FARS” məlumatı yerli mənbələrə istinadən yayıb, lakin hücumun kim tərəfindən həyata keçirildiyini açıqlamayıb. SEPAH-ın “Sepah News” saytı isə hadisə barədə məlumat yaymayıb və məsuliyyəti üzərinə götürməyib.
Birləşmiş Krallığın Dəniz Ticarəti Əməliyyatları Mərkəzi (UKMTO) oktyabrın 1-də üçüncü tərəfdən Hörmüz boğazından keçən tankerin naməlum mərmi ilə vurulduğu və gəmidə yanğın baş verdiyi barədə məlumat aldığını bildirib. Heyətin təhlükəsiz olduğu, dəymiş ziyanın və ətraf mühitə mümkün təsirin isə həmin vaxt məlum olmadığı qeyd edilib.
Tehran fevralın 28-də başlayan və 40 gün davam edən ABŞ-İsrail hərbi əməliyyatlarından sonra Hörmüz boğazından keçidə məhdudiyyətlər tətbiq edib və ABŞ və İsraillə əlaqəli hesab etdiyi gəmilərin hərəkətinə mane olub.
“FARS” boğazda gəmi hərəkətinə nəzarət edən qurum kimi təqdim etdiyi PGSA-ya istinadən bildirib ki, son günlər Hörmüzdə bir neçə neft tankeri hədəfə alınıb. Qurumun iddiasına görə, son üç tanker Birləşmiş Ərəb Əmirlikləri ilə əlaqəli olub.
PGSA-nın məlumatına görə, “Al Ruwais”, “Sinbad” və “Mersin Prosperity” tankerləri son iki ay ərzində Hörmüz boğazından bir neçə dəfə keçməyə cəhd edib. Qurum bu gəmilərin yenilənmiş qaydalara əməl etməyən gəmilərin siyahısına daxil edildiyini bildirib.
Fars körfəzini Oman dənizi ilə birləşdirən strateji əhəmiyyətli Hörmüz boğazı iyunun 17-də imzalanan İslamabad Anlaşma Memorandumundan sonra da İran və ABŞ arasında mübahisəli məsələlərdən biri olaraq qalır. Memorandumun 5-ci bəndinə əsasən, İran 60 gün ərzində kommersiya gəmilərinin Fars körfəzi ilə Oman dənizi arasında təhlükəsiz və ödənişsiz keçidini təmin etmək üçün tədbirlər görməli idi. Sənəddə Hörmüz boğazının gələcək idarəçiliyi ilə bağlı Oman və digər sahilyanı dövlətlərlə dialoq da nəzərdə tutulub.
Tehran ABŞ-ni memorandumun 5-ci bəndinin icrasına mane olmaqda ittiham edir. İran tərəfinin iddiasına görə, ABŞ kommersiya gəmilərinin İranın müəyyən etdiyi marşrutlardan kənarda hərəkətinə dəstək verir.
Daha ətraflı: