Yanvar ayında Minneapolisdə miqrasiya agenti tərəfindən güllələnərək öldürülən ABŞ vətəndaşı Rene Qudun ailəsi Tramp administrasiyasını məhkəməyə verib. Ailə federal rəsmiləri həddindən artıq güc tətbiq etməkdə və Konstitusiyaya zidd hərəkətlərdə ittiham edir.
37 yaşlı Qud yanvarın 7-də Minnesota ştatında keçirilən federal miqrasiya əməliyyatı zamanı ABŞ İmmiqrasiya və Gömrük Mühafizəsi Xidmətinin (ICE) agenti Conatan Ross tərəfindən güllələnib.
Ailə oktyabrın 1-də iki ayrı iddia qaldıraraq təzminat ödənilməsini və işə andlılar məhkəməsində baxılmasını tələb edib. İddialarda Ross və Tramp administrasiyasının yüksəkvəzifəli rəsmilərinin Qudun mülki hüquqlarını pozduğu, “Operation Metro Surge” adlı miqrasiya əməliyyatının isə onun ölümünə şərait yaratdığı bildirilir.
Məlumata görə, Qud həyat yoldaşı Bekka Qudla birlikdə küçədə patrul aparan miqrasiya agentlərini gördükdən sonra avtomobili saxlayıb. İddialara əsasən, Qud qonşuları xəbərdar etmək üçün avtomobilin siqnalını verib, Bekka Qud isə əməliyyatı lentə alıb.
Hadisənin videosunda Qudun əvvəlcə avtomobili qısa müddət geriyə sürdüyü, daha sonra istiqamətini dəyişərək ərazidən uzaqlaşmağa çalışdığı görünür. Bu zaman Ross avtomobilə atəş açıb və Qud ölüb.
İddia ərizələrində Qudun şair və üç uşaq anası olduğu, həmçinin hər hansı federal istintaqın obyekti olmadığı qeyd edilir.
Ağ Ev iddiaları əsassız adlandırıb və Tramp administrasiyasının məhkəmədə öz mövqeyini qətiyyətlə müdafiə edəcəyini bildirib.
ABŞ Daxili Təhlükəsizlik Nazirliyi Rossun və digər miqrasiya əməkdaşlarının hərəkətlərini müdafiə edərək təhlükəli vəziyyətlərdə güc tətbiqinin əsaslı olduğunu bildirib. Ross isə atışma ilə bağlı ictimaiyyətə açıqlama verməyib.
Qudun ölümü Minnesotada federal miqrasiya əməliyyatlarına qarşı geniş etirazlara səbəb olub. Əməliyyat fevralda başa çatıb, Prezident Donald Tramp isə miqrasiya siyasətini müdafiə etməyə davam edib.
“Reuters”in məlumatına görə, Minneapolisdəki federal prokurorlara əvvəlcə Ədliyyə Nazirliyi tərəfindən hadisədə iştirak edən agentləri araşdırmağa icazə verilməyib. Bundan sonra bir neçə prokuror istefa verib. Qudun ölümü ilə bağlı heç bir agentə qarşı ittiham irəli sürülməyib.
Hennepin dairəsinin prokuroru Meri Moriarti Qudun, eləcə də yanvarın sonlarında Minneapolisdə miqrasiya agentləri tərəfindən güllələnərək öldürülən digər ABŞ vətəndaşı Aleks Prettinin ölümünü ayrıca araşdırır.
Araşdırmanın federal qurumların əməkdaşlıq etməməsi səbəbindən çətinləşdiyi bildirilir. Minnesota ştatı isə hadisə yerlərində toplanan sübutlara çıxış əldə etmək üçün Tramp administrasiyasını məhkəməyə verib.