Fransada müəllim çatışmazlığı, siniflərin həddindən artıq dolu olması və məktəb binalarının yararsız vəziyyəti ilə bağlı etirazların zorakılıqla müşayiət olunması fonunda oktyabrın 2-də ölkə üzrə 400 məktəb bağlı qalıb. Qarşıdurmalar zamanı yüzlərlə insan xəsarət alıb, 2 min nəfər saxlanılıb.
Ədliyyə naziri Jerald Darmanen bildirib ki, məktəblərdəki vəziyyətlə bağlı başlayan etirazların ölkə üzrə yayılmasından sonra ictimai asayişlə bağlı vəziyyət daha da gərginləşib.
Ən ciddi qarşıdurmalardan bəziləri Marseldə qeydə alınıb. Viktor Hüqo liseyində şagirdlərdən biri zibil qutusuna benzin tökməyə çalışarkən yanacaq təsadüfən iki müəllimin üzərinə sıçrayıb.
Şəhərdəki Sent-Ekzüperi liseyinin qarşısında yüzlərlə gənc yanğınsöndürənləri avtomobildən düşməyə məcbur edib. Daha sonra avtomobil yandırılıb. Marseldə ictimai nəqliyyat işçilərin xəsarət almasından sonra dayandırılıb.
Nantda məktəblərdən biri yandırılıb, Havrda isə başqa bir məktəbin fasadı yanğın nəticəsində zədələnib. Strasburqda avtomobil yandırılıb, Tuluzada isə polis qüvvələri ilə gənclər arasında qarşıdurma baş verib.
Paris yaxınlığındakı Sen-Denidə gənclər polis qüvvələrinin qarşısına toplaşıblar. Şagirdlərdən biri üzərində “Gözyaşardıcı qazdan istifadə etmədən özümüzü izah edə bilərikmi?” sözləri yazılmış plakat tutub.
Şagirdlər polisi sərt müdaxilədə, o cümlədən gözyaşardıcı qazdan və rezin mərmi atan silahlardan istifadə etməkdə ittiham ediblər. Hökumət nümayişlər zamanı zorakılığı pisləyib, eyni zamanda məktəblərdəki problemlərin həll edilməli olduğunu bildirib.
Daxili işlər naziri Loran Nunesin sözlərinə görə, bəzi ərazilərdə iğtişaş törədən şəxslər zorakılığa təhrik etmək üçün bir məktəbdən digərinə keçiblər. Təhsil naziri Eduar Jefre isə etirazçılar şagirdlərin məktəblərə daxil olmasına mane olduqda dərslərin məsafədən keçirilməsinə çağırıb.
Etirazların başlanması siyasi mübahisəyə səbəb olubEtirazların başlanması Fransada siyasi mübahisəyə səbəb olub. Baş nazir Sebastyen Lekornüyə yaxın mənbənin sözlərinə görə, kəşfiyyat xidmətləri hökumətin böhran iclasında hərəkatın LFI siyasətçiləri və radikal sol çevrələr tərəfindən başladıldığını bildiriblər.
LFI bu iddianı rədd edib.
“LFI həmişə dinc nümayişləri müdafiə edib”, – partiyanın deputatı Lui Boyar BFM TV-yə bildirib.
2027-ci il büdcəsi ilə bağlı qənaət tədbirlərinin müzakirə edildiyi və təhsil büdcəsinin artımının inflyasiyadan geri qaldığı bir vaxtda etirazlar ölkədə siyasi mübahisələrin əsas mövzularından birinə çevrilib.
Etirazlar Fransanın hüdudlarından kənara da yayılıb. Belçikanın Lyej şəhərində yuxarı sinif şagirdləri oktyabrın 1-də etirazlara başlayıblar. Şəhər meriyasının sözçüsü liseylərin oktyabrın 2-də bağlı olduğunu bildirib.